Најдобрата фудбалска репрезентација на Македонија одигра пријателски натпревар со Саудиска Арабија во Прага, Чешка, и загуби со резултат 2:1 на стадионот „Викторија Жишков“.

Нашиот национален тим поведе со фантастичниот гол со ножички на Александар Трајковски во 40 минута, но Саудиска Арабија израмни пред одморот со погодокот на Ал Брикан. Победничкиот гол го постигна Абдулах Ал Хамдан во 78 минута.

Селекторот Благоја Милевски веднаш по натпреварот даде и анализа на пријателскиот меч.

– Има многу моменти од кои сум задоволен, особено затоа што експериментиравме со составот. Добивме уште двајца играчи кои ќе ја засилат конкуренцијата во тимот. Веќе нагласив дека натпреварот со Лихтенштајн е од големо значење за нас, а сè останато служи како подготовка. Одигравме квалитетен меч против силен противник и навистина ми е задоволство што работам со вакви фудбалери. Сите се адаптираат на новата формација и задачите. Против Лихтенштајн ќе бидеме максимално мотивирани, како што сме на секој натпревар – изјави Милевски.

Нашите најдобри фудбалери сега ги очекува дуелот против Лихтенштајн в недела (18.00 часот) на Арената „Тодор Проески“ во Скопје, во петтото коло од квалификациите за Светското првенство. Влезниците за овој натпревар се во продажба, повеќе ТУКА

ФОТО+ВИДЕО | Македонија поразена од Саудиска Арабија на контролниот меч во Прага