Фронтменот на бендот „Ролинг стоунс“, легендарниот Мик Џегер, на 26 јули ќе наполни 81 година, но тој сè уште ужива да биде на сцената и не планира наскоро да престане да пее и танцува на концертните сцени, од кои ја воодушевува публиката повеќе од шест децении, пишува „Ројтерс“.

Мик бил прашан како е да се биде на сцена на 80 години, на што одговорил дека се чувствува добро.

„Како да сте на сцена на 78 години. Беа потребни неколку концерти за да влеземе во ритамот, но сега сме целосно во тоа. Се чувствувам добро“, изјавил Џегер, ден по распродадениот концерт.

„Ролинг стоунс“ моментално настапуваат низ САД на нивната турнеја „Хакни дајмондс“, која започна на 28 април и ќе трае до 21 јули. Џегер во интервјуто ја навести можноста и за концерти во други земји следната година.

„Ќе ги разгледаме тие понуди, каде да одиме и каде ќе биде забавно, знаете. Може да биде Европа, може да биде Јужна Америка, може да биде каде било“, мистериозно одговорил Џегер.

На секој настап, Џегер доминира на сцената по два часа со своите колеги од бендот Кит Ричардс (80) и Рони Вуд (77). Обожавателите велат дека Џегер сè уште изведува енергични настапи полни со вртења, скокови, спринтови и сите негови познати движења.

Актуелната турнеја е именувана по албумот што „Ролинг стоунс“ го објавија минатиот октомври, и добро помина кај критичарите. Тој исто така рекол дека бендот наскоро ќе објави уште нова музика.

Мик Џегер нема да го продава музичкиот каталог на „Ролинг стоунс“: Што ќе им се 500 милиони долари на моите деца