Премиерот Христијан Мицкоски верува дека земјава ќе има најповолни услови за извоз во Соединетите американски држави. Рече дека во моментот разговараат со САД за можни царински олеснувања.

„ Исто така, разговараме со САД за можни царински олеснувања и верувам дека ќе бидеме во групата земји кои што ќе бидат наскоро објавени, кои што ќе имаат услови најповолни за да извезуваат на американскиот пазар. Ние не ветуваме чуда, туку многу работа. Секој ден. За секоја инвестиција, за секое ново работно место, за секој денар повеќе во буџетот, за секој чекор напред на државата“ рече Мицкоски.

САД од денеска најавија испраќање официјални писма до трговските партнери со детали за новите царини и трговски договори. Американскиот претседател Доналд Трамп уште во април најави основна царина од 10 отсто за речиси сите увозни производи, со дополнителни „реципроцитетни“ царини за земји со трговски дефицити со САД. Овие мерки беа паузирани за 90 дена, рок кој истекува на 9 јули.

Мицкоски по денешниот состанок на Советот на странски инвеститори, нагласи дека им подава рака и на домашните и на странските инвеститори, не само декларативно, туку суштински низ институционална поддршка, предвидливи правила и директна комуникација.

Вели дека е свесен за ситуацијата во која се наоѓаат граѓаните поради високите цени, а малите примања, но најави многу скоро дека ќе бидат почувствувани ефектите од растот на економијата.

„Потполно сум свесен дека граѓаните се уште живеат тешко и дека недостатокот на пари е присутен. Но промените ќе ги дадат конкретните резултати многу побрзо и ние вложуваме напори тоа да биде час поскоро и посилно, ефектите од ваквиот раст во економијата неминовно ќе се почувствуваат и јас сум сигурен дека се движиме во добра насока“ изјави Мицкоски по состанокот на Советот на странски инвеститори.

Тој најави дека се водат активни разговори за нови инвестиции во автомобилската индустрија, ИТ секторот, логистиката и агро-преработката.

Во однос на инфлацијата, Мицкоски најави дека Владата многу скоро ќе објави мерки, откако ќе ја проверат базичната инфлација, бидејќи сметаат дека од таму произлегува зголемувањето. Исто така нагласи дека ја следат состојбата со цените во маркетите и дека забележале дека некои се однесуваат непрофесионално и дека ќе следат остри мерки.

Во меѓувреме Државниот завод за статистика ги објави најновите пресметки за трошоците на живот во јуни. Според тоа, трошоците на граѓаните се зголемиле за 4,5 проценти во однос на истиот месец лани. Индексот на цените на мало, пак, бележи зголемување од 3,7 проценти на годишно ниво. Ова покажува дека притисокот врз буџетот на граѓаните продолжува.