„Ми беше мачно во стомакот…“: Колешка го обвини Пласидо Доминго за сексуално вознемирување
Оперската ѕвезда Пласидо Доминго (83) се соочува со нови обвинувања за сексуално вознемирување, кои ги изнесе анонимна жена која беше претставена како негова колешка од Шпанија во ТВ-емисија емитувана во неделата, три години откако славниот пејач се извини за слични обвинувања.
Препорачано
Како дел од истрагата во 2020 година, бројни пејачки, танчарки, музичарки, професорки по музика, кројачки и гардероберки рекоа дека биле сведоци или доживеале несоодветно однесување на Доминго во последните 30 години, но пејачот никогаш не ја призна својата вина.
Последното обвинение го упати негова колешка во програмата на шпанскиот ТВ-канал „Ла Секста“ (La Sexta). Нејзиниот идентитет е заштитен, па во ТВ-програмата се слушал само гласот, а фигурата ѝ била заматена. Таа рекла дека на почетокот на 21 век, Доминго се обидел непримерно да ја допре по една проба, а во друга прилика се обидел да ја бакне без оглед на нејзиното противење.
– Една од првите работи што ти ја кажуваат во нашите кругови е да не влегуваш во лифт сама со Пласидо Доминго – изјавила жената за „La Sexta“.
– Првиот пат почувствував непријатност кога бевме на проба. Тој (Пласидо) ми рече пред сите: ‘Слушај, можам ли да ја ставам раката во еден од овие твои убави џебови’. Тогаш носев панталони со извезен заден џеб – рекла таа.
– Ми се слоши во стомакот затоа што во тој момент размислував што да му одговорам за, сепак, да ја продолжиме пробата на вообичаен начин. Ако му кажам не, ќе има последици, а ако кажам да, не сакам ни да помислам што може да се случи – рекла неименуваната Шпанка.
Таа рекла и дека тогаш не го пријавила Доминго ниту кај своите шефови, ниту кај властите.
– Тој е Доминго… недопирлив. Не би требало да биде, но јас сум во втор план – раскажала таа. Агентите на Доминго не одговорија на барањето на новинарот за коментар на нејзините изјави.
Со истрагата од 2020 година на Американското здружение на музички уметници (АГМА) е заклучено дека Доминго се однесувал несоодветно. Тогаш пејачот изјави дека ги почитува одлуките на жените да проговорат и дека „навистина му е жал за болката“ што им ја нанел.
Но, обвинувањата ги поттикнаа шпанските оперски и музички куќи да ги откажат планираните ангажмани на Доминго. Истото го направија и американските музички институции, вклучувајќи ги Метрополитен операта во Њујорк и Операта во Сан Франциско.
Доминго поднесе оставка од функцијата генерален директор на Операта во Лос Анџелес, откако внатрешна истрага покажа дека 10 тврдења од жртвите на неговото вознемирување се „веродостојни“. На суд потоа, ниту по една тужба не беше покрената ниту една кривична постапка против пејачот.
Во интервју за шпанскиот весник „Ел Мундо“ во јануари 2022 година, Доминго негираше дека некого вознемирувал и рече дека чувствува дека е осуден од судот на јавното мислење, бидејќи тој самиот не проговорил за сè. Тој исто така рече дека истрагата на АГМА била нецелосна и делумна и дека, според него, содржела само неколку конкретни факти.
Потоа Доминго се врати во Шпанија каде по речиси година ипол отсуство настапи на хуманитарен концерт во јуни, а во меѓувреме настапуваше и во други земји.
