Иако многу актери велат дека оваа работа ја работат затоа што тоа е нивна страст, нема сомнеж дека задоволството е поголемо кога конечно ќе добијат голем хонорар. Сепак, Мет Дејмон е совршен пример дека не се работи секогаш за пари.

53-годишниот ја одбил шансата да стане најплатен актер за неговата улога во еден од најголемите филмови на сите времиња. Имено, Џејмс Камерон сакал Дејмон да се појави во Аватар и му понудил десет отсто од заработката. Но, Дејмон го одбил.

„Во тоа време работев во постпродукција на „The Bourne Ultimatum“, па го одбив“, изјавил Дејмон.

Со оглед на конечната заработка на филмот, доколку Дејмон се согласел да се појави како Џејк Сали, кој на крајот го играше Сем Вортингтон, тој ќе заработел околу 250 милиони долари.

„Ги оставив тие пари на маса, но ми беше јасно дека со тоа што морав да кажам не, веројатно ја пропуштив можноста некогаш да работам со него. Тешко ми беше и сè уште жалам за таа одлука“, заклучил Дејмон.