Реџеп Мемеди, директорот на Детската клиника, информира дека на клиниката е зголемен бројот на пациенти со респираторни и цревни инфекции.

-Во овој дел од годината доминираат сезонските вируси кои се почести. И тоа е скоро секоја година во овој дел од годината. Имаме зголемен број на пациенти со респираторни симптоматологии и цревни инфекции кои се третираат на нашата клиника и ја добиваат потребната нега – рече Мемеди на денешното промовирање на апаратури во Детската клиника.

Директорот Мемеди нагласи дека работат со полн капацитет и се обидуваат максимално да направат правилна тријажа и потешко болните пациенти да ги задржат на болничко лекување.

Институтот за јавно здравје во својот извештај за периодот од 30 декември 2024 до 5 јануари 2025 година посочува дека е зголемен бројот на заболени од грип. Од вкупно 331 заболени, 101 се деца на возраст од 5 до 14 години и 42 деца на возраст од 0 до 4 години.

Министерот за здравство Арбен Таравари истакна дека министерството ќе ги разгледува случаите во кои загадувањето на воздухот прави штета на здравјето на пациентите.

-Тоа го работат експерти. Меѓутоа, во Министерството за здравство имаме екипа која што подготвува такво нешто. Меѓутоа сепак тоа не е цел само на Министерството. Ние го разгледуваме повеќе тоа што загадувањето прави штета на здравјето на пациентите, рече Таравари.