Уметницата Марија Павловска е награденa со меѓународната награда „Леонардо да Винчи“ (Злато / Специјално издание за 2024 година), што ја доделува италијанската фондација „Ефето арте“ (Effetto Arte Fondazione). Станува збор за меѓународно признание за дело кое влијае врз глобалната уметничка сцена.

– Наградата е признание за оние што го издигнуваат нашето постоење на повисоко ниво со убавината или инспирацијата на нивниот креативен талент. Се доделува на реномиран уметник, скулптор, креативец или визионер, чија работа претставува значаен придонес за уметничкото наследство на светот – истакнува Павловска.

Комисијата што ја доделува наградата е составена од членовите на фондацијата „Ефето арте“: претседателот Сандро Серадифико и кураторите Франческо Северио Русо (историчар на уметноста) и Салваторе Русо (експерт за глобалната уметничка сцена).

Доделувањето на наградата „Леонардо да Винчи“ се одржало во Националниот музеј за наука и технологија „Леонардо да Винчи“ во Милано. Наградата се состои од статуа, трофеј и каталог со дела на уметникот.

(Текстот е објавен во „Културен печат“ број 232, во печатеното издание на весникот „Слободен печат“ на 24-26.5.2024)