Работната група за уставните измени денеска требаше да го донесе деловникот за работа, по што ќе следува и методологијата за работа за нацрт-иницијативата за потребата за отворање на Уставот, изјави Маргарита Цаца Николовска, претседателка на работното тело за уставните измени. Николовска рече дека нема рок за подготовката на нацрт иницијативата, но бидејќи станува збор за приоритетно прашање за државата јасно е дека нема да се одолговлекува работата во тоа тело, иако и министерот за надворешни работи Бујар Османи и вицепремиерот за евроинтеграции Бојан Маричиќ претходно изјавија дека деновиве или до крајот на месецов очекуваат предлог уставниот амандман да биде готов.

„Почнуваме ефективно да работиме како работна група. Почнавме да работиме на деловникот за работа на работната група. Има повеќе прашања што се внесени во деловникот, кој ќе биде јавно објавен. Средбите ќе се интензивираат во зависност од тоа како ќе оди работата. Ќе се земат предвид претходно преземените обврски на членовите, потребата од реагирање наспроти остварувањето на стратешката цел на државата, а тоа е нацрт-иницијативата за отворање на Уставот“, рече Николовска.

Таа ги отфрли како шпекулации информациите дека освен внесувањето на Бугарите и на други помали заедници во Преамбулата, таа да се збогати со наратив за утврдување на самобитноста на македонската нација и корените на македонскиот јазик.

„Работиме на деловникот за работа на работната група, потоа ќе ја опфатиме и методологијата на работата. Утре, задутре и решенијата веројатно ќе може да ги видите, како и претходните документи, заклучоци на Владата, како и заклучоци и одлуки на Собранието врзани за се она за што претходно се укажуваше од Европската унија. Ова е наша приоритетна работа и во таа насока ќе се движиме. Сè друго е чиста шпекулација од аспект на работата на работната група“ рече претседателката на работното тело.

Таа изјави дека работната група нема рок до кога треба да го подготви нацрт-иницијативата за отворање на Уставот. За бојкотот на ВМРО-ДПМНЕ и другите опозициски партии да се вклучат во работната група, Николовска оцени дека тоа не е во прилог на демократијата и на владеењето на правниот поредок.

„Она што е важно е дека на сите им беше понудено да бидат дел од оваа работна група. Тоа што одредени партии и личности не прифатија да бидат членови на работната група е нивен проблем. Жалосно е што не сакаат да учествуваат во работата каде што ќе може да ги презентираат своите аргументи и предлози и јавноста да знае што кажале едни и што кажале други. Меѓутоа, избрале друг начин на активност, кој според мене не е во ред и што не може да донесе до она што значи ефективно, јавно прикажување на работите и, од друга страна, презентирање на аргументите. Аргументите се најголема сила на која било одлука. Зборување на страна, давање изјави без да се знае и без да се конфронтираат мислењата и аргументите и да се презентираат одлуки, не оди во насока на демократија, на владеење на правото и, ако сакате, не оди во насока на соодветно информирање на јавноста“,  вели Николовска.

Премиерот Димитар Ковачевски во интервју за „Гласот на Америка“ повтори дека уставните измени во делот на вклучување на делови од народи во Преамбулата за кои е потребно двотретинско мнозинство не смеат да бидат предмет на политички условувања.

Премиерот Ковачевски појасни дека доколку овие одлуки станат предмет на политички уцена, тогаш државата не може да напредува во остварување на својата стратешка цел.

„Не може остварувањето на членството на ЕУ, кое обезбедува подобар животен стандард на граѓаните, повисоки плати, подобар правен систем, подобро владеење на демократијата, поголема социјална заштита итн., не може да биде заложник на кариерата на еден човек или на една политичка партија. Ова е процес на сите политички партии, ова не е процес на еден човек, не е процес на една партија, не е процес на една влада, ова е широк општествен процес што е веќе започнат“, вели Ковачевски.

Тој повтори дека штом ќе бидат подготвени амандманите тие ќе одат на јавна расправа со бизнис и со академската заедница, со политичките партии, по што ќе влезе во собраниска процедура каде сите партии, особено пратениците, имаат обврска со своето одлучување да обезбедат подобра иднина за сегашните и за идните генерации, бидејќи овие одлуки се за иднината на државата и не можат да бидат предмет на дневна политика, како што не биле во земјите што влегле во ЕУ.

Од ВМРО-ДПМНЕ и вчера го повторија ставот дека за нив темата уставни измени е затворено прашање.