Во шестата епизода на емисијата „Мамавизија“ ќе гледате една вистинска приказна за животот на една мајка со ќерка во количка. Нашата хероина е Оливера Савеска, мајка на храбрата Марија.
Марија е 23-годишната девојка која живее со церебрална парализа, врзана за количка, и не може самостојно да ги извршува секојдневните активности. Оливера животот комплетно ѝ го посветува на нејзината ќерка. За првпат пред јавноста ја раскажуваат нивната приказна.

-Од моментот кога ќе се разбуди, таа има потреба од помош да стане, да се смести во седечка положба во количката. Едната рака не ѝ е во функција, па затоа тешко може да се облече сама, да се избања. За неа редовното туширање е неопходно бидејќи по цел ден е во количката која ја поти – раскажува Савеска.

Марија и покрај состојбата е многу енергична и има многу активности. Од мала ги сака музиката и танцот. Животот го исполнува со активна посета на приватни часови по танц и пеење. Јавноста ја познава како Пепелашка во првата инклузивна претстава.

-За жал, не сум самостојна, за сите активности ми е потребна помош. Моите родители уште од дете се обидуваат да ме носат секаде за да не пропуштам ништо. Јас многу сакам и културни настани и да бидам дел од нив и да ги посетувам. Мајка ми до ден денес прави жртва, за моите потреби се откажува од своите – вели Марија Савеска.

Во „Мамавизија“, Савеска низ солзи раскажува за тоа дека нејзината ќерка кога била мала застанала на нозе, ги направила и првите чекори, но по извесно време забележале дека нешто се случува.

-Паметам како тогаш ги известуваа другите родителите дека нивното дете ќе има попреченост. Јас впивав и слушав и во исто време бев многу среќна дека нашето дете е здраво и нема никаков проблем. Подоцна самите сфативме дека нешто не е во ред. Сè почна од предвременото породување, кога сестрата по грешка запиша дека сум 37. наместо 31. гестациска недела. Јас упорно се обидував да им кажам дека бебето што го носам е мало, но никој не ме слушаше и ме породија предвреме. Подоцна ми признаа дека ме воделе како родилка во 37. недела – вели таа.

Савеска се присетува и за денот кога инкубаторот во кој лежела нејзината ќерка бил замаглен.

-Откако се роди, Марија беше во инкубатор 40 дена. Еден ден многу се вознемирив кога видов како живее моето дете. Инкубаторот беше целиот замаглен, ја „свариле“ во него. Викав лута и барав помош. Една од сестрите ми рече дека некој не ја регулирал соодветно влажноста – вели таа.

Савеска верува дека да не се случеле овие лекарски пропусти, денес Марија ќе била на нозе.

Нивното секојдневие до ден денес е полно со предизвици. Во потрага за најдобрата грижа и нега, со цел подобрување на состојбата на ќерката, еден период на рехабилитација го поминале и во странство. Животот им поминува во борба за подобри услови за живот. Од пристапност на улиците, до училиштата, институциите.

-Кога ги правеа улиците во нашето маало со сопругот одевме да ги молиме да направат рамни тротоари, не нè разбираа, се расправавме околу сантиметрите, па бевме принудени да одиме со Марија на самото место за да им покажеме што ни е потребно. Подоцна дел од нив ни се заблагодаруваа за тоа „школо“ што сме им го дале – раскажува таа.

Во времето кога ја запишувала во основно имало само едно инклузивно училиште во населба Аеродром. Тие со нас споделија и за лошите погледи, непријатните ситуации со кои се соочувале, па биле принудени и да се преселат.

-Во старото маало каде што живеевме во една приградска населба, се соочувавме со многу лоши ситуации. Тоа го припишувам на менталитетот. Ја навредуваа Марија, ѝ се смееја дека била голема во количка, ја гледаа чудно. Кога ќе ме прашаше: „Зошто ме гледаат така?!“, јас ѝ велев: „Затоа што си најубава“. Кога се преселивме во Аеродром се препородивме. Соседите беа многу пријатни откако ги разбраа нашите потреби, дури подоцна тие се караа за нашето паркинг место со други луѓе – вели таа.

Вечерва во 20 часот целиот разговор со хероините Савески погледнете го премиерно во „Мамавизија“ на јутјуб-каналот на „Слободен печат“.
Водител и автор на емисијата е Александра Вуксановиќ.