Во групата А во Дебрецин, Унгарија, во рамките на второто коло на Европското првенство, македонската женска сениорска ракометна репрезентација одигра нерешено 25:25 против Турција.

Македонките на овој натпревар влегоа максимално мотивирани, како што најавија пред натпреварот, но и Турција на овој настап не дојде со бело знаме. Натпреварот започна со нешто побрзо темпо. Се играше гол по гол, а првата значајна предност Турчинките ја донесоа во 13 минута од „плус три“ (7:4) со голот на Јасемина Шахин.

Набрзо следеше поголема предност кога во два напада Саздовска и Јанкуловска направија технички грешки кои противничките вешто ги искористија и направија вишок од „плус пет“ во 20 минута (11:6). Но, македонската селекција успеа да ја стопи таа предност со головите на Сара Ристовска, а на паузата беше 13:10 во корист на Турција. Слично се виде и подоцна кога турските ракометарки повторно имаа „плус пет“ во 38 минута (20:15).

Се чинеше дека Македонија веќе немаше одговор, а следеше одлична реакција, каде избраничките на Кристијан Грчевски за пет минути направија голема серија од 7:0 за 22:20 и го приведоа мечот до неизвесна завршница. Турската селекција повторно го сврте резултатот во своја корист и поведе со 25:24 во 57 минута од мечот. Македонија во последната минута изнуди седмерец кој успешно го реализираше Јована Кипријановска за конечни 25:25.

Најефикасна кај Македонија беше Сара Ристовска со осум гола, додека за Турција Гокдемир Емина постигна седум гола. Ова воедно беше и прв бод на ракометарките на Македонија по цели 16 години, каде што го освоија седмото место на Европското првенство на кое бевме домаќини.