Пионерската женска одбојкарска репрезентација на Македонија со пораз од организаторот Црна Гора, 0:3 (11:25, 14:25, 23:25), го започна настапот на БВА Балканскиот шампионат за одбојкарки до 16 години во Плевља.

Нашите надежи во првите два сета играа во грч и тоа им создаваше проблеми и голем број на технички грешки што му овозможи на противникот лесно да дојде во предност од 2:0 во сетови.

Македонија одигра одличен трет сет, во кој имаше контрола над резултатот се до 17:15.

Сепак избраничките на селекторот Горан Славков не го издржаа притисокот и дозволија Црна Гора прво да израмни на 17:17, а потоа и константно да се игра поен за поен. Црногорките ја искористија првата сет и меч топка за стартна победа на Балканијадата.

Македонските пионерки новата шанса за прва радост во Плевља ќе ја бараат утре, кога во рамките од второто коло од 15.30 часот ќе ги измери силите со Турција.