Третиот настап во низа како дел од елитното европско репрезентативно натпреварување машката сениорска одбојкарска репрезентација на Македонија го започнува попладнево од 15.00 часот, кога во „Гопас Арената“ во Братислава, Словачка, ќе се соочи против селекцијата на Финска.

Финците се прв предизвик за тимот на селекторот Јошко Миленкоски, кој по пауза од година дена се враќа на кормилото на националниот тим, кој е подмладен за оваа акција. Финска е познат противник за нас и со него се соочувавме во последниве години.

За разлика од претходните дуели, сега, либерото Костадин Ричлиев ќе ја превземе комплетната одговорност за играта во поле и тој треба да биде столбот на одбраната на екипата. Одбојкарот на освојувачот на Купот, Штип УГД има неколкугодишен стаж во А тимот, но сега добива реална шанса, која е подготвен да ја искористи.

– Пред три години играв како прво либеро во Европската Сребрена лига и на Медитеранските игри, но во Златната лига прв пат добивам таква шанса. Не само јас, мислам дека комплетната екипа е подготвена. Финска е квалитетен и релативно млад тим, желен за докажување. Ги анализиравме, играат одлично. Нè очекува тежок ривал покажа и на вчерашниот нивни дуел со Словачка. Ние влегуваме оптимистички расположени, без бело знаме, ќе играме со секого и против секој ќе го дадеме максимумот, а тоа треба да ни донесе и резултат – вели либерото на националниот тим Ричлиев.

Денешниот противник на нашите одбојкари вчера имаше перфектно отворање на Златната лига, со 3:0 во сетови и доминантна игра го победи домаќинот на првиот турнир Словачка.

Македонија денеска ќе игра и против традицијата со оглед на тоа дека досега во три меѓусебни натпревари со Финска сите ги имаме загубено со 3:1. Два натпревари ни се во групната фаза од Европските првенства во 2019 и 2021, додека едно соочување имаме во ЦЕВ Европската Сребрена лига 2022.