Првиот турнир од Европската златна лига 2024 е во Струмица од петок до недела (17-19 мај), ќе има по еден натпревар дневно, билетите чинат 100 денари кога игра најдобрата македонска одбојкарска репрезентација, а в сабота влезот е слободен. Преносите ќе одат на МТВ-1 од 20.00 часот.

Два дена до вториот настап по ред во Европската златна лига – елитното годишно репрезентативно натпреварување на ЦЕВ. Македонските одбојкари предводени од новиот селектор Хари Наковски ќе играат со Естонија в петок и со Чешка в недела, на првиот од трите турнири чиј домаќин ќе биде Струмица во салата „Парк“.

Наковски од асистент на Јошко Миленкоски го презеде кормилото на селекцијата, техничарот Филип Деспотовски ја заврши кариерата, примачот Александар Љафтов побара одмор за Европската златна лига и ќе се приклучи на подоготовките за евроквалификациите во август. Тоа значи дека шанса ќе добијат неколкумина помлади одбојкари, дебитанти се Михајло Мирасчиев од Штип УГД и Кристијан Илиев од Струмица 47&72, Давид Стојанов ќе му биде поддршка на Ѓорѓи Ѓорѓиев на позиција техничар, а Стојан Илиев и Лука Костиќ ќе бидат во примачкиот двоец на теренот со Владо Милев. Промени и соодветни подмладувања ќе има и кај Естонија и кај Чешка со која игравме на последниот еврошампионат во Скопје, така што Македонија се надева на добра игра иако капитенот Никола Ѓорѓиев бара да не си наметнуваме притисок сами на себе.

– Според моите информации, противниците ќе имаат променет состав, но за мене ова е нова генерација и во македонската репрезентација. Затоа, ние треба да се обидеме да изградиме игра, да бидеме постојани, да изгледаме како на првата пријателска со Романија во Валчеа. Ако е така, ќе имаме шанса пред домашната струмичка публика да се надеваме на победа или на две, но тоа не е императив – вели капитенот на Македонија, Никола Ѓорѓиев.

Состав на македонската одбојкарска репрезентација:

Техничари: Ѓорѓи Ѓорѓиев (Бурса-Турција), Давид Стојанов (Фужинар-Словенија)

Коректори: Никола Ѓорѓиев (АЦХ Љубљана – Словенија), Стојче Арсов (Работнички 71&22), Кристијан Илиев (Струмица 47&72)

Примачи: Владо Милев (Струмица 47&72), Лука Костиќ (Рибница – Србија), Стојан Илиев (Анагенисис – Кипар), Тоше Ефремов (Весна Пробиштип), Ангел Бошков (Работнички 71&22)

Средни блокери: Филип Маџунков (Хасроде – Белгија), Филип Савовски (Војводина – Србија), Филип Лепидовски (Таково – Србија), Михајло Мирасчиев (Штип УГД)

Либера: Дарко Ангеловски (Работнички 71&22), Костадин Ричлиев (Штип УГД)

Европската златна лига е значајно натпреварување, но главната цел на македонската одбојкарска репрезентација летово ќе бидат двата квалификациски натпревари против Грузија и Грција за следното Европско првенство, кое според новиот календар на ЦЕВ, наместо во 2025, ќе биде организирано во 2026 година.

– Ние ќе дадеме максимум и тоа е најважно за нас. Естонците и Чесите ги променија составите, но и ние сме подмладени, така што ќе играме барем за една победа. Овој турнир ќе биде на наш терен и се надевам дека со помош на струмичката публика ќе успееме да направиме добар резултат во двата натпревара. Многу ќе ни значи навивачите да ја наполнат салата и да бидат наш седми играч – рече селекторот Хари Наковски.