Чувајте го јазикот како црнка во окото, тоа е душата на еден народ. Без јазик си никој и ништо. Со овие зборови и пораката од УНЕСКО дека „секој има право да создава и да се изразува на мајчиниот јазик” денеска во Институтот за македонски јазик „Крсте Мисирков” беше одбележан Меѓународниот ден на мајчиниот јазик.

Пред бројните гости кои го наполнија амфитеатарот во Институтот беше испратена пораката за почитување на сопствените корени, како и толеранција, прифаќање и почитување на различностите. Меѓу нив беа и членови на семејствата Мисиркови и Шопови, како и ученици од средни и основни училишта.

-Тоа му го должиме на светот, зашто светот му го озвозможи тоа на македонскиот јазик, рече во обраќањето директорката на Институтот Елена Јованова-Грујовска.

Таа предупреди дека во интензивната глобализација, на многу „мали“ јазици им се заканува исчезнување.

-Научниците препорачуваат архивирање и документирање на загрозените јазици. Ние не го сметаме македонскиот јазик за загрозен, но ги сметаме картотеките на нашиот Институт за непроценливо важни. Затоа, со финансиска поддршка од Владата и Министерството за култура, архивиравме пет милиони ливчиња со лексиколошки, ономастички, дијалектолошки и црковнословенски записи за сегашните и идните генерации, рече Јованова-Грујовска.

Во богатиот јазичен материјал трајно заштитен со проектот за дигитализација на картотеките, додаде таа, е и поезијата на Ацо Шопов и пораката на Крсте Мисирков: „Јазикот е средство со кое ние осознаваме што мисли, што чувствува и што сака нашиот соговорник“.

Пред присутните се обрати и министерката за култура Бисера Костадиновска-Стојчевска и кжа дека македонскиот јазик е нашиот идентитет, темелот и срцето на нашата нација.

-Имаме должност да го негуваме, да го заштитиме како наше најголемо духовно и културно наследство, изјави Костадиновска-Стојчевска.

Таа најави и дека годинава ќе добиеме и нов закон за употреба на македонскиот јазик со кој ќе се зацврстат механизмите на чување, негување, ширење и афирмација на стандардниот македонски јазик.
Според рекоторот на Универзитетот „Св. Кирил и Методиј“ Никола Јанкуловски, секој треба да го негува и да му оддава почит на својот мајчин јазик, а „доколку го цениме сопственото, ќе може да го почитуваме и другото”.

-Секој има право да го користи својот мајчин јазик, да ги чува спомените, традициите и размислувањата кои се вградени во неговиот јазичен код. Јазикот е културно наследство во кое се обединува духовната и материјалната култура на човештвото. Мајчините јазици со својата разноликост го прошируваат нашиот светоглед и се исклучително важни за идентитетот на секоја личност, рече ректорот.

Во светот денеска се одбележува Меѓународниот ден на мајчиниот јазик , прогласен од УНЕСКО на 30-тата сесија на Генералната конференција во 1999 година, а наредната 2000 година 21 февруари е промовиран како Ден на лингвистичка и културна разновидност и мултилингвизам.

Во Декларацијата на УНЕСКО за културна разновидност, меѓу другото, е наведено правото на секоја личност да се изразува и да создава на јазик што ќе го избере, а особено на мајчин јазик.

На половината од околу шест илјади јазици што се зборуваат во светот им се заканува исчезнување, а во околу 200 земји се зборува за мали јазици со мал број говорители кои се соочуваат со предизвик да бидат зачувани. Во последните три века изумираат или драматично се намалува бројот на јазици.