Македонскиот бас-баритон Иван Наумовски ќе одржи рецитал со „Песни од патување“
Во Музејот на македонската борба, на 16 јуни, со почеток во 20 часот, ќе се одржи концертен рецитал на бас-баритонот Иван Наумовски и пијанистката Елена Атанасовска Ивановска под наслов „Песни од патување“.
Препорачано
На програмата на рециталот се дела од Р. Шуман, Ј. Хајдн, Ј. Брамс, Ж. Ибер, Р. В. Вилијамс, но и дела од македонските автори Томислав Зографски, Горан Начевски и Дарија Андовска.
Композиторот проф. Горан Начевски нему му го посветил своето видување на македонската народна песна „Параходот“, а композицијата „Марика мома убава“ од проф. Томислав Зографски е култно дело во македонската музичка историја.
Со македонската премиера на композицијата „Со маки сум се родил јас“, Иван Наумовски го заокружува циклусот „Песни од татковината“ на композиторката проф. Дарија Андовска, чија изведба ја почна на целовечерниот концерт на маестро Симон Трпчески.
Македонскиот бас-баритон Иван Наумовски ги завршува своите дипломски студии по соло пеење со највисоки оценки на ФМУ во Скопје, во класата на проф. м-р Марија Муратовска, а магистрира на Универзитетите во Грац и Виена. Како студент е освојувач на три балкански натпревари во Македонија, Црна Гора и Косово.
Иван бележи многубројни настапи во земјава со оркестарот на МОБ и Македонската филхармонија, и на рецитали на фестивали во различни градови, како што се „Скопско лето“, „Денови на македонската музика“, „Интерфест“ и „Есенски музички свечености“.
Низ неговата соло кариера, Иван бележи настапи во Норвешка, Австрија, Хрватска, Германија, Чешка и др. Во 2015-та ја добива престижната македонска награда „Виртуози“ во категоријата „млад уметник“, а во 2016 дебитира во МОБ на отворањето на „Мајските оперски вечери“ со главната улога во истоимената опера „Евгениј Онегин“.
Скорешните ангажмани ги вклучуваат улогата на Дон Фернандо во концертна изведба на „Фиделио“, и како солист во бетовеновата Деветта симфонија. Во 2020-та настапува со Симон Трпчески на сцената во Македонската филхармонија на фестивалот ДММ, и се наоѓа во финалето на натпреварот во Инсбрук, Австрија.
Влезот на концертот во Музејот на македонската борба е слободен.
