Победа на стартот од турнирот W75 во Букурешт, Романија, на македонската тенисерка Лина Ѓорческа. Во исцрпувачки меч што траеше 170 минути Ѓорческа ја совлада домашната тенисерка Георгиа Крачун со 2:1 во сетови (6:4, 4:6, 7:5). Турнирот се игра за награден фонд од 60.000 долари.

Македонската тенисерка поведе во мечот откако го доби првиот сет со 6:4 во сетови, откако постојано водеше. Во вториот сет Крачун имаше предност во сетот што го доби со идентични 6:4.

Во решавачкиот сет македонската тенисерка поведе со 3:0 во гемови, а противничката израмни на 3:3.

Ѓорческа имаше ново водство од 5:3, но Крачун пак изедначи на 5:5, за следните два гема да ги освои македонската тенисерка што значеше и победа и пласман во следната рунда.

Во второто коло нашата тенисерка в четврток ќе игра со победничка од мечот на квалификантките италијанската тенисерка Ноеми Бастилети, која со 2:1 ја победи Лаура Маир.