Еден од најискусните играчи во македонската сениорска кошаркарска репрезентација, Андреј Магдевски ќе ја понесе капитенската лента во овој претквалификациски циклус за пласман на Светскиот куп во 2027 година.

Магдевски е новиот капитен на националниот тим, вака одлучи селекторот Марјан Илиевски. Еден од најискусните кошаркари кои во овој момент ги има селекторот на располагање, ја доби довербата да ја предводи селекцијата низ подготовките, и оние мечеви од мундијалските претквалификации против Романија и Унгарија.

– Ќе ми биде, односно ми е голема чест што ќе го заменам Војдан ова лето. Но, секако со „капитенската лента“ доаѓа и поголема одговорност на теренот, како и во соблекувалната. Ќе се обидам атмосферата во екипата да остане како што била и до сега, и на теренот сите да продолжиме да играме за тимот и да гинеме за секоја топка – вели Магдевски.

Првата прилика да истрча прв на теренот како предводник на сениорскиот национален тим ќе ја има вечерва во Гевгелија, каде од 19.00 часот, Македонија ќе го има првиот од двата предвидени контролни натпревари за време на подготовките. Во спортскиот комплекс „НБ Ноел“ во Негорски бањи ќе гостува репрезентацијата на Швајцарија.

– За сега подготовките одат во добра насока. Условите за тренинг во Негорски бањи и во Гевгелија се на едно високо ниво. Моментално фокусот е повеќе ставен на физичката спрема и кондиција. Овие два дена нè очекуваат контролни натпревари против репрезентацијата на Швајцарија која е долго време заедно, и се надевам дека ќе покажеме дел од сработеното овие десетина дена кои се зад нас.

По неколку ФИБА „прозорци“, Џејкоб Вајли е повторно дел од репрезентацијата, играч кој доаѓа со голема желба и мотивација да игра за овој дрес и ќе се потруди неговото искуство да го пренесе на оваа подмладена репрезентација – рече новиот капитен на најдобрата селекција на Македонија.

Џејкоб Вајли повторно ќе игра за македонската кошаркарска репрезентација