НАСА најави дека нејзината следна мисија кон Месечевата орбита со човечка посада може да се реализира веќе во февруари идната година. Доколку биде успешна, тоа ќе биде прв пат по повеќе од половина век луѓето да отпатуваат толку далеку од Земјата.

Мисијата под назив „Артемис II“ ќе биде првиот лет со екипаж во рамки на амбициозната програма „Артемис“ на НАСА. Целта не е само повторно слетување на Месечевата површина, туку и воспоставување одржливо човечко присуство на Месечината и во неговата орбита, што ќе биде темел за идни мисии кон Марс.

„Артемис II“ ќе пренесува четиричлен екипаж на десетдневно патување околу Месечината, по што астронаутите безбедно ќе се вратат на Земјата. Кристина Кук ќе стане првата жена што полетала околу Месечината. Виктор Гловер ќе биде првиот црн астронаут кој учествува во ваква мисија. Во екипажот се и Рид Вајсман и Џереми Хансен.

Мисијата ќе тестира клучни системи на леталото „Орион“, развиено од НАСА и „Ербас“. Леталото е дизајнирано да обезбеди услови за живот во длабокиот вселенски простор.

„Ние го обезбедуваме сервисниот модул, кој содржи сè што е потребно за астронаутите да преживеат на патот до Месечината“, изјави Шијен Клајвер, раководител на европскиот сервисен модул во „Ербас“.

Таа објасни дека модулот располага со резервоари со вода, кислород и азот, авионски навигациски системи и соларни панели за напојување, како и модул за погон кој овозможува летот кон Месечината и враќањето назад.

Иако луѓето првпат зачекорија на Месечината за време на мисиите „Аполо“ пред повеќе од 50 години, програмата „Артемис“ е насочена кон долгорочно присуство.

„Аполо беше фокусиран на кратки мисии – одиш таму, правиш експерименти и се враќаш. Со ‘Артемис’ целта е создавање одржливо човечко присуство на Месечината и во неговата орбита“, истакна Клајвер. „Желбата е Месечината да стане одскочна даска за патувања кон Марс, бидејќи директниот лет од Земјата до Марс бара премногу гориво и енергија.“

Астронаутите веќе тренираат во специјални центри кои го имитираат месечевиот терен, за да бидат подготвени за уникатните предизвици на животот и работата на друго небесно тело. Минатата недела, НАСА ја претстави и најновата класа астронаути – десет избрани од над 8.000 кандидати.