Вардар 1961 денеска е поразени во финалето на меѓународниот турнир „Хумел Куп“ во Магдебург, Германија. Видовме две различни полувремиња, добро прво и лошо второ за „црвено-црните“ кои на крајот беа поразени од домаќинот Магдебург со конечен резултат 31:20.

Играчите предводени од тренерот Весели Вујовиќ на стартот стекнаа убава предност од 5:2 после осум минути игра. Репрезентативниот голман Томовски беше одличен, а одбрана беше многу добра.

Македонскиот шампион добро играше и во нападот против бундеслигашот чија мрежа се тресеше од различни позиции. Преку Гаџа Вардар имаше можно да ја зголеми предноста на највисоки четири голови разлика, но одбрани голманот на германската екипа и од тој момент започна кризата во редовите на Вардар.

Вујовиќ направи неколку измени во нападот, при 8:5 позитива за Вардар скоро ништо не функционираше за нашиот претставник во понатамошниот дел од мечот. Домаќинот израмни на 8:8, дури и поведе, а десното крило Георгиевски се погрижи за нов егал.Финишот од првото полувреме им припадна на домаќинот кој успеа да стигне и до два гола разлика. Повторно се стрелаше преку Георгиевски кој во првиот дел беше стопроцентен, со неговиот гол се замина на полувреме со резултат 12:11 за Магдебург.

Доколку во првото беше рамноправен и водеше, Вардар одигра многу лошо во вторите 30 минути. Единствено само на почетокот од вториот дел се израмни на 12:12, а потоа Германците направија низа од 6:1 за 18:13 што се покажа како клучен момент за крајниот епилог.

Расположен беше противничкиот голман со своите интервенции, додека Вардар не можеше да се поврзе во овој дел од натпреварот, а ривалот во секој напад скоро беше непогрешлив, Томовски немоќен на голот. Во 45 минута резултатот беше 23:14, и тука веќе сите дилеми беа решени околу победникот. Магдебург едноставно направи висока разлика која беше недостижна за нашиот шампион.

Францускиот пивот Жереми Тото од редовите на Вардар 1961 беше прогласен за најкорисен играч (МВП) на турнирот.