Осмото издание на Медиумскиот фестивал Скопје ќе се одржи од 26 до 28 ноември во мултимедијалниот простор „Котур“ и е посветено на локалното новинарство. Фокусирајќи се на основната градбена клетка на новинарството – локалното известување, на овогодишниот МФС ќе се дискутира за прашања што ги засегаат медиумските работници ширум Македонија.

Фестивалот ќе почне со дискусија на тема „Моќта на локалните гласови и новинарството на локално ниво“, каде што ќе се разгледаат предизвиците и улогата на локалните медиумски работници, како и проблемите со кои тие се соочуваат.

Покрај дискусиите, фестивалските денови носат и филмски репертоар од впечатливи документарни остварувања кои покриваат различни аспекти од повеќеслојната новинарска задача, како и разни работилници за младите новинари.

Филмската програма ја отвораат документарците „За весникот“ на добитничката на наградата „Еми“, Хедер Кортни, и „Лош печат“, преку чии примери се отсликува судбината на безброј локални весници ширум светот.

На вториот фестивалски ден ќе се прикажат „Залутани тела“, за принудниот т.н. медицински туризам во Европа, и „Небото над Зеница“ за погубното загадување во Босна. Фестивалот ќе го затвори филмот „Промена на вестите“, за дигитална платформа создадена како обид да се разбие едноличната машка доминација во редакциите во САД.

МФС традиционално ги разгледува предизвиците со кои се соочуваат жените во медиумската сфера во Македонија, годинава преку дискусија за солидарноста и градењето заедница меѓу жените во медиумите.

Третиот фестивалски ден е фокусиран на учеството на младите во медиумите, започнувајќи со работилница за фотоновинарство, каде на младите новинари ќе им биде претставена моќта на визуелните приказни. А дискусија за како да се поттикне вклучување на младите во новинарската професија ќе следи веднаш по прикажувањето на два кратки документарни филма изработени во рамки на Програмата за млади новинари на ПИНА.

Фестивалот е во организација на Платформата за истражувачко новинарство и анализи – ПИНА, ќе се одржи во „Котур“, а како и секогаш настаните се бесплатни и отворени за сите заинтересирани.