Еурофарм Пелистер вечерва во салата „Боро Чурлевски“ во Битола во својот втор натпревар сезонава во Лига Европа одигра нерешено 25:25 против Кадетен Шафхаузен. Иако македонскиот претставник имаше убава предност после првото полувреме од 15:9, на крајот само освои бод.

Битолчани водеа и со „плус седум“ (16:9) и ја најавуваа првата европска победа, но како и во минатото второто полувреме е друга „песна“ за нашиот клуб.

Швајцарците дури дојдоа и до шанса да си заминат со целиот „плен“ од ова гостување, во финишот стекнаа и минимална предност од 22:23.

Како најефикасни стрелци кај домаќините се одвоија Мандалиниќ со шест голови и Кушан со четири. На спротивната страна седум погодоци запиша Шелкер, а по четири Марос и Фримел.

На табелата во групата „Д“ води Кадетен со три бода, а Еурофарм Пелистер е претпоследен на петтата позиција со еден.