В недела (4 септември) со почеток од 19.00 часот во салата „Боро Чурлевски“ во Битола екипата на Е. Пелистер 2 ќе го игра реванш натпреварот од првото квалификациско коло во Лигата на Европа против Алпла Хард.

Потсетување дека на првиот меч во Австрија противникот триумфираше со 24:21, а играчите на тренерот Александар Јовиќ веруваат дека можат да ја анулираат негативата.

– Очекувам перфектна вечер в недела. Искрено верувам дека ќе ги добиеме со помош на публиката. На наши грешки го загубивме натпреварот во Австрија. Се надевам дека ќе ги поправиме тие грешки, бидејќи добро го анализиравме противникот. Мислам дека ќе победиме со четири или повеќе гола разлика. Треба да играме наша игра и да не мислиме многу на противникот – вели ракометарот на Е. Пелистер 2, Иван Димитровски.

И неговиот соиграч Павле Петровиќ верува дека перформансите на тимот ќе бидат подобри на возвратната пресметка.

– Првите впечатоци се силни, најмногу заради тоа што мене тоа ми беше прв европски натпревар. Мислам дека можевме многу подобро и загубивме на нашите грешки. Ако секој го даде својот максимум и со помош на публиката можеме да ги победиме. Добро се држевме во одбраната во Австрија, но многу грешевме во нападот и затоа загубивме. Можеме да им парираме и многу подобро ќе биде на реваншот во Битола – се зборовите на Петровиќ.