Дирекцијата за култура и уметност – Скопје на прес-конференција ја најави комплетната програма на јубилејното 45. „Скопско лето“, најомилената летна манифестација во главниот град на државата.

Јубилејното 45. издание на мултимедијалната манифестација „Скопско лето“ ќе биде свечено отворено со ексклузивниот концерт на хрватскиот пијанист и композитор Звјездан Ружиќ на 21 јуни во Куршумли ан.

Тој го носи статусот на најдобар џез-пијанист во Хрватска. Петпати бил награден со престижната награда „Порин“, а во Скопје ќе се претстави со уникатниот проект „Пијанотрон“.

Комплетната програма на „Скопско лето“, што ќе се одржи од 21 јуни до 31 јули, содржи дваесет и два концерти, девет театарски претстави од кои три се за деца, седум изложби, како и две промоции на книги.

Директорот на Дирекцијата за култура и уметност Никола Глигоров на прес-конференција посочи дека за оваа година за програмата на фестивалот се обезбедени 800 илјади денари од Министерството за култура.

– Се обидовме годинава да направиме достојна програма за „Скопско лето“ во неговото јубилејното 45. издание. Своевремено имавме 2 милиони денари од Град Скопје и 2 милиони денари од Министерството за култура, но оваа година програмата ја правиме само со 800 илјади денари од Министерството за култура – посочи Глигоров.

На прес-конференцијата се обратија и повеќе координатори на програми што ќе бидат изведени ова лето. Сања Шуплевска од Уметничкиот центар „Полифонија“ најави дека првиот нивни проект е „Вивалдијада“, што ќе се одржи на 25 јуни во соработка со хорот „Св. Злата Мегленска“.

– „Скопско лето“ за многумина од нас претставува почеток на солистичката кариера и тоа не само на мојата генерација, туку и на генерациите подоцна. Ние секоја година се обидуваме да понудиме интересна програма. Годинава ќе се претставиме со неколку проекти – рече Шуплевска.

Таа посочи дека „Вивалдијада“ е проект што обединува ученици од средното музичко училиште „Илија Николоски – Луј“ и нивните професори, а следниот настан ќе биде концертот на младата вокална солистка и гитаристка Ана Петановска на 4 јули со наслов „Најдоброто од Копров“, на кој како ексклузивни гости ќе настапат Владо Јаневски, Наде Талевска и Горан Наумовски.

– Имаме уште еден проект на 8 јули, каде што ќе настапиме во соработка со уметници од Љубљанската филхармонија. Станува збор за современа музика од современи словенечки автори и од современи македонски автори. Истиот проект подоцна ќе го повториме на Љубљанскиот фестивал. Со овој концерт ќе одбележиме 40-годишна кариера на Зоран Митев, кој е професионален фаготист од Љубљанската филхармонија, а кој е Македонец по потекло, иако долги години живее таму – објасни Шуплевска.

Горан Наумовски, кој е дел од организацијата на „Скопско лето“, и кој е проектен координатор на концертот на Звјездан Ружиќ, рече дека концертот ќе трае речиси два часа и ќе има многу убава програма. Тој ја најави и изведбата на театарската претстава „Лекција“ од Ежен Јонеско, во режија на Ѓорѓи Ризески од Штипскиот театар на малата сцена во НОБ.

– Станува збор за многу иновативна екипа, прекрасна претстава којашто отсликува едно општество. Тоа е модерна претстава што отсликува малку изместени вредности во едно расипано општество, меѓутоа на многу суптилен начин и е претстава која треба да се погледне. Додека, со проектот „Најдоброто од Копров“ на еден начин ќе му оддадеме почит на Глигор Копров за неговото творештво – додаде Наумовски.

Уметничкиот директор на Оркестарот на „Фаме’с институт“, Маја Чанаќевиќ, на прес-конференцијата најави дека на 6 јули во Сули ан ќе се одржи концерт на Оркестарот на „Фаме’с институт“, а диригент ќе биде Конрад Ван Алфен. Како солист ќе настапи квартетот саксофони „Артварк“. Таа посочи дека следниот концерт е на 22 јули во Сули ан, каде што по вторпат во државата ќе настапи познатата романска виолинистка Ирина Мурешану заедно со американскиот диригент Скот Флавин и Оркестарот на „Фаме’с институт“.

Александар Герасимовски од Музичката младина најави дека на 24 јули ќе се одржи завршен концерт од кампот „Етно Македонија 24“ на Музичката младина на Македонија, во соработка со „Jeunesses Musicales International“, додека, пак, на 31 јули ќе се одржи концерт на Камерниот оркестар на Музичката младина на Македонија „Саша Николовски – Ѓумар“, а диригент ќе биде Иван Еминовиќ. Со тој концерт ќе биде спуштена завесата на јубилејното 45. „Скопско лето“.

(Текстот е објавен во „Културен печат“ број 236, во печатеното издание на весникот „Слободен печат“ на 21-23.6.2024)