Ленгстон Вилсон е најновото засилување на кошаркарскиот клуб Пелистер, кошаркар кој ќе биде од голема помош во предизвиците во домашното првенство, како и во европското деби што ги очекува „зелено-белите“ оваа натпреварувачка сезона.

Станува збор за центар висок 210 сантиметри кој ќе биде од огромна помош во борбата под обрачите.

Настапуваше во НЦАА-лигата за универзитетите Вашингтон и Милвоки, а ланската сезона ја мина во Турција, бранејќи ги боите на Бодрумспор.

Имаше просек од 10,3 поени и 6,8 скокови по натпревар, а најдобриот меч го одигра против вториот тим на Фенербахче, на кој америкаскиот центар стигна до дабл-дабл од 24 поени и 11 скокови.

Со ангажманот на Ленгстон Вилсон беше комплетиран и последниот шести странски трансфер на Пелистер летово, откако претходно беа потпишани договори и со Никола Малешевиќ, Џордан Скипер-Браун, Остин Прајс, Си-Џеј Вилсон и со Брејси Дејвис.

Од претходно е познато дека нов тренер на екипата е Борче Даскаловски, нов играч е и македонскиот репрезентативец Андреј Митревски, а нови договори потпишаа Лука Стојановски, Бобан Стајиќ, Дамјан Крстевски и Дарко Најдовски.