Затнатите артерии, познати како атеросклероза, можат да играат значајна улога во предизвикувањето на неколку сериозни срцеви болести.

Многу е важно да се грижиме за здравјето на срцето, бидејќи кардиоваскуларните болести се една од водечките причини за смрт во светот, покажуваат податоците на Светската здравствена организација (СЗО).

Тоа е широка категорија која опфаќа многу различни болести и варијации на нарушувањето, но секоја од нив вклучува нарушување на барем една од виталните функции на срцето, вклучително и дистрибуција на крв и кислород до остатокот од телото.

Затнатите артерии, познати како атеросклероза, можат да играат значајна улога во предизвикување на неколку сериозни срцеви болести и поттикнуваат итни случаи, како што се срцев и мозочен удар.

Со текот на времето, артериите кои носат крв низ телото стануват исполнети со леплив материјал наречен плак, кој може да се состои од холестерол, калциум и фибрин. До одреден степен, затнатите артерии може да се ублажат и да се вратат назад, но вистинскиот предизвик е да се фати состојбата навреме за да се овозможи тоа.

– Комплексноста на затнувањето на артеријата и срцевите болести е во тоа што обично нема никакви симптоми и тоа е нивната опасност. Вообичаено, кога ќе се појави некој симптом, тоа е драматичен и трауматичен настан, како што е срцев или мозочен удар. Бидејќи затнувањето на артериите е постепен процес, не се случува сè одеднаш, а бидејќи блокадата е бавна, симптомите се исто така бавни – објаснува д-р Иан Смит за „Парада“.

Најдобар начин да се спречи затнувањето на артериите е да се одржува здрава исхрана и да се вежба многу. Меѓутоа, бидејќи артериите понекогаш почнуваат да се затнуваат уште во дваесеттите години од животот, препознавањето на симптомите, колку и да се суптилни, е исто така клучно.

Така, д-р Иан Смит и кардиоваскуларниот хирург, д-р Џонатан Јанг, посочуваат на некои од најчестите предупредувачки знаци за затнати артерии во различни фази од процесот.

Притисок и болка во градите

Силната болка во градите е јасен знак за срцев удар, но дури и блага болка и притисок може да бидат сериозен предупредувачки знак.

– Класичниот знак на коронарната артериска болест е болка во градите како притисок во средината на градниот кош или малку налево, особено додека сте активни – вели д-р Јанг.

Но, тој додава дека болката предизвикана од блокираните артерии може да се појави на неколку други места, вклучително и низ раката (почесто левата рака) и во вратот каде што се наоѓа артеријата. Покрај тоа, д-р Јанг вели дека болката што се појавува кога некој е во мирување е позагрижувачка отколку кога некој чувствува болка во градите додека се напрега.

Скратен здив, забрзано чукање на срцето и палпитации

Отежнатото дишење (недостиг на здив) во текот на вежбање или краток здив при мирување исто така може да биде знак за затнати артерии, велат лекарите.

– Поради намалениот проток на крв во срцевиот мускул поради оваа болест, срцето може да ослабне и да предизвика отежнато дишење, бидејќи крвта се враќа во белите дробови, а крвта богата со кислород не може ефикасно да се турка напред – вели д-р Јанг.

Недостигот на кислород, исто така, може да доведе до абнормален срцев ритам, што пак, за возврат може да доведе до побрзо чукање на срцето. Овие симптоми може да бидат резултат и на спазам на коронарната артерија, кој се појавува кога артеријата во срцето се стеснува и затвора. Затнатите артерии може да ги предизвикаат и овие настани.

Вртоглавица, гадење и печење во нозете и рацете

Симптомите како што се вртоглавица и гадење исто така може да бидат показатели за срцеви заболувања, иако жените ги доживуваат почесто од мажите. Вртоглавица може да се појави како резултат на намален проток на крв.

– Поради типот на нервните завршетоци во срцето, блокираните артерии можат да создадат нејасни, генерализирани сензации, а не само дискретни болки во градите. Пациентите често опишуваат притисок, пецкање или вкочанетост во левата страна на градниот кош, но и по должината на вратот и низ која било рака – заклучил д-р Јанг.