Д-р Џејмс О’Донован укажа на два важни предупредувачки знаци на рак на панкреасот за кои секој треба да биде свесен. Иако овие симптоми не значат дека ја имате болеста, тие треба дополнително да се проверат, пишува британски „Експрес“.

Две важни работи коишто тој секогаш ги проверува кај своите пациенти се:

– жолтица кај пациенти на возраст од 40 и повеќе години
– губење на тежината во комбинација со дијареја (пролив), болки во грбот, болки во стомакот, гадење, повраќање, запек или новодијагностициран дијабетес кај пациенти на возраст од 60 години и постари.

„Првата препорака е итно да се испрати пациент на возраст од 40 или повеќе години со жолтица да се провери за рак на панкреасот“, рече О’Донован, објаснувајќи дека жолтицата е предизвикана од акумулацијата на билирубин, темно жолто-кафеава супстанција произведена во црниот дроб.

„Нормално, црниот дроб ослободува течност наречена жолчка, која содржи билирубин. Жолчката поминува низ заедничкиот жолчен канал во цревата, каде што помага во разградувањето на мастите. Конечно, го напушта телото преку столицата. Кога жолчката не може да стигне до цревата , билирубинот се акумулира во телото“, истакна докторот.

Жолтицата не влијае само на кожата и очите. Може да предизвика темна урина, светла или мрсна столица и чешање на кожата.

„Важно е да се запамети дека ракот на панкреасот не е најчеста причина за жолтица. Камењата во жолчката, хепатитисот и другите болести на црниот дроб и жолчните канали се многу почести виновници“, вели докторот.

Губење на тежината и други симптоми

Д-р О’Донован ги упатува сите пациенти на возраст од 60 години или постари кои доживуваат губење на тежината во комбинација со дијареја, болки во грбот, болки во стомакот, гадење, повраќање, запек или новодијагностициран дијабетес за итна компјутерска томографија.

Ако забележите некој од овие симптоми, треба да разговарате со вашиот матичен лекар.