Најдобриот стрелец во историјата на НБА, Леброн Џејмс, би можел да ја заврши својата ера во Лејкерс порано од очекуваното. Иако официјално ја активираше играчката опција за следната сезона и најави дека останува во Лос Анџелес, најновите информации говорат поинаку, барем кога би се прашувал само неговиот тим.

Американскиот новинар Џон Габадоро открива дека челниците на Лејкерс размислуваат сериозно да стават крај на соработката со ѕвездата, и тоа можеби уште ова лето, пред Џејмс да стане слободен играч следната година.

Според новиот договор, Леброн треба да инкасира околу 52 милиони долари за наредната сезона и тоа сума што е повисока од минатата сезона. Но, договорот не содржи излезна клаузула, што значи дека клубот не може еднострано да го раскине без согласност од Џејмс.

Во позадина на оваа идеја стои и долгорочниот план на Лејкерс за ослободување на буџетот и креирање тим во кој главна улога би имал Лука Дончиќ.

Сепак, задачата нема да биде едноставна бидејќи Леброн пред крајот на кариерата не изгледа дека би можел да се откаже од богатиот договор за последната сезона.