По повод 25-от роденден на „Екотип“ на 14 септември, во големата сала на Македонската филхармонија, со почеток во 20.30 часот, ќе настапи легендарниот музичар Дарко Рундек со проект што ќе го изведе заедно со македонскиот Биг-бенд на Здружението на џез музичари. Билетите за концертот се продадени пред две недели.

Концертот беше најавен на прес-конференција на која учествуваа Дарко Рундек, Илија Андреевски, извршен директор на „Екотип“, Гоце Стевковски и Џијан Емин од Здружението на џез музичари, а модератор на настанот беше новинарот Љупчо Јолевски. На конференцијата беа присутни и Маја Ривиќ, вокалистка, и Игор Павлица, трубач, од групата на Рундек.

Модераторот Љупчо Јолевски појасни дека на концертот ќе биде изведен албумот „За ваша попладневна разонода“, што Дарко Рундек го снимил со Биг-бенд оркестарот на Хрватската радиотелевизија (ХРТ), додека на концертот во Скопје песните ќе бидат изведени со македонскиот Биг-бенд на Здружението на џез музичари. Проектот за првпат се изведува надвор од границите на Хрватска.

Албумот „За ваша попладневна разонода“ содржи 12 песни, а инспирација за насловот Рундек добил од истоимената емисија емитувана на загрепското радио кога бил дете.

– Слушав внимателно и веројатно толку ми се врежала во потствеста, што сега гледам дека тој свинг секогаш провејува низ мојата музика – рече Рундек.

Конкретен повод за организирање на концертот е прославата на 25-годишниот јубилеј на компанијата „Екотип“, чија основна мисија во работата е екологијата и заштитата на животната средина, и која во текстовите на Рундек пронаоѓа многу заеднички идеи во остварувањето на своите цели.

– Многу е емотивна целата приказна, а почнува од моето детство. Сум пораснал со музиката на „Хаустор“ и на Дарко Рундек, во средношколските денови со албумите „Третиот свет“ и „Болеро“, па сѐ до денес. Пред две години, кога излезе албумот „Бришан простор“, најдов многу, за мене, мистериозни позадини во текстовите кои не се само музика, туку пренесуваат вредности за живеење и некаков бунт и сеќавање на старите убави времиња. Тоа го почувствував како стремеж кон подобра иднина и кон подобар свет. Низ текстовите на Рундек се пронаоѓа и „Екотип“, бидејќи делиме исти вредности – рече Илија Андреевски, извршен директор на „Екотип“, кој со поддршката на концертот си исполнува сон од детството.

Во однос на снимањето албум со џез-оркестар Рундек посочи дека во својата кариера почнал како рокер, потоа продолжил со групи со кои негувал кабаретски концепт, но го барал својот музички израз и во други музички бои, вклучувајќи го и џез-изразот, а пред сѐ изразот на биг-бенд. На прашањето дали соработката со Биг-бенд го доживува како некаков врв во својата кариера, тој одговори дека снимањето на материјалот во студио се одвивало по секции и дека е задоволен и почестен од соработката со аранжерите и со биг-бендот на ХРТ.

Аранжманите на песните на албумот се на Мирон Хаусер, Лука Жужиќ и Мак Муртиќ. За Гоце Стевковски, претседател на ЗЏМ и член на Биг бендот, тоа многу им ја олеснило работата во подготовките за концертот.

– Задоволство е ваквата соработка, која се надоврзува на континуитетот на квалитетна приказна која ЗЏМ ја живее со години. Ние размислувавме за овој концертот веќе извесно време, со јубилејот на „Екотип“ само се забрзаа работите – рече Стевковски.

Стевковски рече дека имале извонредна соработка со Рундек при подготовката на концертот, додека диригентот Џијан Емин додаде дека ќе биде неизвесно и ќе има пријатни изненадувања на концертот.