Најдобрите македонски ракометари во контролен меч загубија во Вараждин од Хрватска со резултат 27:25.

Тоа беше последниот тест пред настапот на Светското првенство кое ќе почне на 14 јануари и ќе трае до 2 февруари.

Селекторот на нашата репрезентација, Кирил Лазаров беше изразито задоволен од настапот на своите играчи после тесниот пораз од „коцкестите“.

– Мене ми е најважно како селектор дека се боревме, тоа беше главна и основна цел против една силна репрезентација како Хрватска. Не треба да се предаваме, на СП ќе дојдат доста наши навивачи, да не ги разочараме. Овој тест против Хрватска беше едно големо искуство за нас, за оваа генерација – рече Лазаров.

Наши ривали на Мундијалот во рамките од групата Д се селекциите на Унгарија, Холандија и Гвинеја.