Македонската ракометна репрезентација денеска од 18 часот во Талин го игра претпоследниот и исклучително важен натпревар од квалификациите за Европското првенство, а селекторот Кире Лазаров го објави списокот на ракометари кои ќе настапат против Естонија.

Со оглед на ситуацијата на табелата, Македонија нема простор за грешка, мора да се победи Естонија, а потоа и Литванија (со поголема разлика од три гола), за да се задржи континуитетот на настапи на големите натпреварувања.

Во пресрет на клучниот дуел, Лазаров реши да го врати искусниот Мартин Томовски, кој повторно ќе застане меѓу стативите заедно со стандардниот Никола Митревски.

Позитивна новост е и деби настапот за младиот Мартин Ивановски, кој со одличните настапи во дресот на РК Алкалоид си го заслужи првиот повик во сениорската селекција.

Селекцијата е подготвена за борба, а вечерва ќе биде првиот од двата последни испити кои мора да се положат – сè со цел Македонија и следната година да биде дел од европската ракометна елита.

Македонија денеска игра во Талин за продолжување на патот кон ново Европско првенство