Министерот за трговија, туризам и телекомуникации Расим Љаиќ изјави денеска дека Србија на 25 октомври не влегува во Евроазиската економска унија (ЕАЕУ), како што се шпекулира деновиве во српските и регионалните медиуми, туку само потпишува договор за слободна трговија што досега го имаше со Русија, Белорусија и Казахстан.

– Онаков договор, како што имаме со Турција или со земјите од ЦЕФТА, изјави Љаиќ за „Политика”, додавајќи дека Евроазиската унија, во меѓувреме, се проширила и на Ерменија и Киргистан и има донесено одлука да ги усогласи договорите за слободна трговија со трети земји, меѓу кои е и Србија – вели Љаиќ.

– Ова не е нов ССП, нема политика, само трговија. Во рамките на Евроазиската унија, решено е да се започне со обединување на сите договори за слободна трговија што претходно ги имаа со трети земји. Ако Србија речеше дека не сака да го потпише договорот, нашиот договор за слободна трговија со Русија би бил доведен во прашање – додава Љаиќ.

Тој додаде дека ваков договор не потпишува само Србија, туку и сите други земји кои имаат договори за слободна трговија со членките на ЕАЕУ.

На 25 октомври, Србија потпишува договор со ЕАЕУ со кој ќе се заменат постојните договори и кој ќе вклучува и проширен список на бесцарински производи.