Откако се мачеше во поголемиот дел од првото полувреме, ракометната репрезентација Македонија ја оствари својата прва победа на Светското првенство откако со 29:20 славеше против Гвинеја, обезбедувајќи си пласман во главната рунда.

А во следната фаза ривали ќе ни бидат селекциите на Австрија, Катар и Франција.

Најголем придонес во триумфот имаше Филип Кузмановски кој реализираше 12 голови и кој воедно беше прогласен за играч на натпреварот.

– Среќни сме за победата, ова е награда за напорната работа и тренинзите пред СП. Одигравме добро против Унгарија, но на крајот немавме среќа. Нема да коментирам што се случуваше на мечот против Холандија, треба да ги гледаме нашите грешки. Тука нема да застанеме, треба тактички да се подготвуваме, да знаеме што правиме. Верувам во момците, горд сум на нив, одиме чекор по чекор. Немаме многу време за одмор. Тука во Вараждин имаме голема поддршка и се чувствуваме како. Ќе направиме анализа на следните ривали, играчите се фокусирани, гинат за националниот дрес – изјави Кузмановски за Македонската Телевизија.

Македонија ќе го започне главниот круг со еден бод, а сега сигурно ќе направи чекор напред во однос на Мундијалот организиран во 2023 година, каде што заврши на 27. место.

Голманот Марко Кизиќ исто така заврши добра работа, кој успеа да запре 15 удари за 43% одбрани.

– Одличен меч, на стартот бев во грч. Но, како што одеше натпреварот, добивав голема поддршка од играчите и трибините и тоа добро ми дојде да се опуштам. Се чувствуваме одлично, имавме три квалитетни натпревари. Владее добра атмосфера во тимот, ја остваривме првичната цел. Одиме чекор по чекор, на дуелот против Австрија можеме да победиме доколку бидеме прави – рече Кизиќ за МТВ.