Фелипе Кутињо и официјално е нов фудбалер на англискиот премиерлигаш Астон Вила. Бразилецот до крајот на сезоната ќе настапува во Астон Вила како позајмен играч од Барселона која пак соопшти дека обврската да ја исплаќа неговата плата ја презеде премиелигашот.

Се очекува во текот на викендов Кутињо да пристигне во Бирмингем и да ги заврши формалностите околу медицинските прегледи и работната виза по што и официјално ќе биде претставен пред навивачите на Астон Вила. Англискиот тим има можност на крајот од сезоната да го откупи договорот на Филипе Кутињо.

Бразилецот во Барселона пристигна 2018 година од Ливерпул и тоа во трансфер вреден 135 милиони евра, но никогаш не ги оправда вложените средства. Една година помина на позајмица во Баерн Минхен, а покрај тоа во кариерата има играно и за Интер, Еспањол, Ливерпул и Васко да Гама.

Интересно е што во Астон Вила, Кутињо повторно ќе соработува со Стивен Џерард кој две и пол години му беше соиграч во Ливерпул. Сега Џерард ќе му биде тренер на Бразилецот.