Тетово на големо се подготвува за дочек на косовскиот премиер Албин Курти. Пред влезот на Тетово Курти ќе биде пречекан со пораката „Добредојдовте во Тетово премиере“ испишана само на албански јазик на платно и закачена на надвозник, а во градот истата порака ја има на билборди.

По повод пристигнувањето на косовската делегација, локалната самоуправа одлучи сите паркинзи утре да бидат бесплатни.

„Исто така, Општина Тетово ги известува граѓаните дека утре од 07:00 до 22:00 часот ќе биде забрането паркирање на зона А2 од кружниот тек кај Веро до центарот на градот и зона А3 од центар до Тропико. Оваа одлука доаѓа поради посетата на високата делегација од Република Косово предводена од премиерот г. Албин Курти на Општина Тетово. Ги замолуваме граѓаните утре да не ги паркираат автомобилите на зоната А2 и А3 за да избегнат казни. Општина Тетово во соработка со Јавното претпријатие ‘Градски паркинг‘ одлучија утре сите паркинг места во Тетово да бидат бесплатни. Исто така, ги известуваме граѓаните дека утре ќе бидат отворени дворовите на основните и средните училишта, како и паркингот зад зградата на општината“, соопштија од Општина Тетово.

Премиерот Курти ќе пристигне во 16 часот во Тетово. Ќе има средба со градоначалникот Билал Касами, а потоа ќе се упатат кон шарпланинското село Вејце каде и двајцата ќе промовираат, односно покренат идеја за поврзување на сите шарпланински села со патот Тетово-Призрен, делница која е далеку од реализација, ниту пак е ставена на хартија.

Потоа од Вејце, Курти со општинската делегација ќе се симне во Тетово каде на градскиот плоштад во 20.30 часот во негова чест ќе биде одржан концерт, откако заедно со неговиот домаќин Касами ќе се обратат пред јавноста.

Пред 3 месеци косовската претседателка Вјоса Османи пред влезот на градот, беше „пречекана“ со билборд само на албански јазик со слична порака како таа на Курти.

За време на посетата на Османи, која по средбата со Касами направи обиколка во центарот на градот, а посети и основно училиште, Тетово беше невообичаено чист, отпадот го немаше на јавните површини, контејнерите не беа преполни со смет, а сообраќајниот хаос „исчезна“.

Претходно, во скопската општина Чаир, пак, предвидено е косовскиот премиер да се сретне со градоначалникот Висар Ганиу, но и со Изет Меџити како основач на новата политичка партија „Демократско движење“. Со Ганиу ќе ја отворат улицата која го носи името на албански патриот и деец Адем Демачи, додека со Меџити, според најавите, ќе разговараат за политичките случувања во земјава, со акцент на активностите кои ги предвидува политичката партија која по заминувањето од ДУИ ја формира нивниот поранешен потпретседател.

Курти в петок во Тетово и во Чаир, Касами организира забава, Меџити ќе информира за новата партија

Добредојде за Османи само на албански јазик, посетата на претседателката ги испразни контејнерите и го растовари сообраќајот во Тетово