Новооснованиот Културно-информативен центар (КИЦ) во Битола со големи ентузијазам и оптимизам ги реализираше своите активности во текот на 2022 година и нивниот прв извештај за сработеното покажува одлични резултати.

Реновираниот Офицерски дом и современиот дизајн на Кино „Манаки“ во Битола овозможија создавање нова културна установа, која според резултатите што ги постигна во првите десет месеци од работата значајно придонесува во збогатувањето на културниот живот во градот на конзулите.

– Не постои поголемо задоволство од добро завршена работа, оправдана доверба и, секако, задоволна публика. Ни претставува чест што бевме домаќини на повеќе од четиристотини културни и други јавни настани за само десет месеци активна работа во 2022 година, при што примивме преку шеесет и пет илјади (65.000) публика, а на сценските простори на КИЦ Битола, во Офицерскиот дом и Кино „Манаки“, настапиле преку петстотини (500) изведувачи од сите културни сегменти, како музичари, актери, поети, сликари, фотографи, мултимедијални артисти и др. Воедно, КИЦ Битола се појавува и како продуцент на неколку важни настани, а особено важно е да се напомене меѓународната активност со пет настани од меѓународен карактер во наша продукција и иницијатива, при што промовиравме седум нови сценски простори достапни за уметниците и публиката – истакнуваат од КИЦ Битола во својот извештај.

Бројките се навистина импозантни и зборуваат за една сериозна динамика, фокусирана културна политика и професионален капацитет на установата. Имено, од реализирани четиристотини и шест настани, сто дваесет и три (123) се концерти, претежно на класична музика, седумнаесет изложби (17), дваесет и пет театарски претстави (25), сто и тринаесет кинопроекции (113) и стотина други настани од мултимедија, литература и други.

Меѓу настаните што се одржаа во текот на 2022 година од КИЦ Битола со гордост ги истакнуваат концертот „Македонисимо“ на Симон Трпчески и пријателите, концертот „Стабат Матер“ на Камерен оркестар под покровителство на Општина Битола, одбележувањето на Светскиот ден на џез-музиката со концерт на Сашо Поповски трио и изложбата „Џезтетика“ на фотографката Татјана Ранташа, Градските приказни на КУД „Илинден“ со наслов „Битола е градот“, проектот „Св. Кирил и Методиј“ на Театарската школа „Бабец“ и КИЦ, петтиот Меѓународен фестивал на кларинет и саксофон „СаксКлар 2022“, „Пијано фест“, претставата „Веселите жени од Виндзор“ во рамките на „Шекспир фестивал“, Фестивалот на хармоники, „Бит фест“, концертот на камерниот оркестар „Профундус“, ревијалната вечер на серенада „Ех, таа серенада“, Меѓународната ликовна изложба „Вернисаж ААМА 19“, концертот на пијанистот Дино Имери, настапот на Камерен ансамбл „Нонет+“, четвртиот Форум на креативните градови за филм од мрежата на УНЕСКО, изложбата на македонски и италијански уметници „Mirror Face to Face“, изложбата „Атланти и Хипербореа“ на Владо Ѓорески, СЕЕ филм фестивал, ИФФК „Браќа Манаки“ – студентска програма, Битолска современа уметност – галериска поставка, концертот на Виенски инструментални солисти, концертот на хорска музика со хорот „Триглав“ и многу други.

– КИЦ Битола во оваа година влегува уште поамбициозно, како со набавка на техника за уметничка реализација и презентации, така и со промовирање на нова современа веб-страница kicbitola.mk, која содржи целосен преглед на програмската и ресурсната структура на установата, настаните, архива, можност за резервации и слично – најавуваат од центарот.

Од КИЦ Битола најавуваат уште еден амбициозен проект, односно електронското списание за култура и уметност „Бели хоризонти“, во кое ќе бидат поместени теми од културата и уметноста, архитектурата, сликарството, литературата, со што КИЦ Битола си поставува нови предизвици и стандарди во работењето.

Исто така, КИЦ Битола е поддржан со четири проекти од национален интерес од Министерството за култура од областа на ликовната уметност, интердисциплинарните уметности и меѓународната соработка, а поддршката од Општина Битола, освен во институционалниот дел, доаѓа и со поддршка на повеќе проекти. Охрабрени од досегашните динамика и успех, продолжуваат во 2023 со нови проекти иницијативи и настани, известија од КИЦ Битола.

(Текстот е објавен во „Културен печат“ број 168, во печатеното издание на весникот „Слободен печат“ на 25-26 февруари 2023)