Култниот македонски рок-бенд „Мизар“ на 15 декември ќе одржи концерт во МКЦ во Скопје
Еден од најавтентичните и најпрепознатливи македонски рок-бендови „Мизар“ на 15 декември, од 20 часот, ќе одржи концерт во Младинскиот културен центар во Скопје.
Препорачано
Според организаторот „Чув де чув“, скопскиот концерт е најава на поголема активност на „Мизар“, ќе следува концерт и во Белград, а има планови за настап и во регионалните балкански центри во текот на 2025 година.
Групата, која својата креативна енергија ја црпи од православното духовно наследство, а за своја инспирација ја зема ѕвездата на надежта – Мизар, низ повеќе музички откровенија има оставено блескава трага на македонската и екс-југословенската музичка сцена.
Годинава беше реиздадено винилното издание на нивниот легендарен истоимен прв албум од страна на матичниот издавач „Хелидон“, а се очекува и реизданието на вториот албум „Свјат dreams 1762-1991“. Групата работи и на својот нов албум и веќе е објавен синглот „Псалм 135“.
Еминентниот музички новинар Драган Амброзиќ во својот осврт кон реизданието на првиот албум на „Мизар“ напиша: „’Мизар‘ се претвори во трајно регионално добро. До денес останаа бенд кој е во постојана потрага по суштината, бенд кој поставува прашања, а не некој што нуди лесни одговори! И денес е потполно во тренд со најсвежите планетарни изданоци на дарквејв-бендовите.“
Во текот на пролетта годинава (на 12 мај) скопската публика можеше да го проследи уникатниот концерт на „Мизар“ во големата сала на Филхармонија, каде безвременските песни на групата беа изведени во акустично руво. На концертот на 15 декември во МКЦ групата ќе настапи со нова постава.
Во основата на бендот се Горазд Чаповски на гитара и Илија Стојановски на бас и процесор, а на нив ќе им се придружат Пеце Китановски (бас-гитара), Принц (клавијатури, придружни вокали), Драган Теодосиев (тапани), Нико Ѓоргиевски (вокал и перкусии) и вокалите од „Хармосини“ Сава Булатовиќ и Христијан Моневски (виола, кларинет, флаута, лира).
На концертот ќе бидат изведени новиот сингл „Псалм 135“, дел од новите песни на бендот, но и веќе химничните теми од претходните албуми, како „Дождот“, „Магла“, „Девојка од бронза“, „Градот е нем“, „Почесна стрелба“, „Златно Сонце“.
(Текстот е објавен во „Културен печат“ број 260, во печатеното издание на весникот „Слободен печат“ на 14-15.12.2024)
