Во последно време сѐ почесто како симптом на ковид-19 се спомнува крвавењето од носот.

Ширењето на делта сојот на коронавирусот на планетата, донесува и нови симптоми карактеристични за оваа мутација. Во последно време сѐ повеќе се спомнува крвавењето од носот како еден од знаците дека личноста е заразена со ковид-19.

Засега нема научни докази дека крвавењето од носот е знак за ковид-19. Сепак, веќе е познато дека информациите за оваа болест пристигнуваат постојано, пишуваат на веб-страницата „Хелт“. Затоа, не треба да изненадува ако овој проблем наскоро се најде на списокот на индикатори за болеста, како што се случи и со другите симптоми што со текот на времето беа додадени на тој список.

Што предизвикува крвавење од носот

Крвавењето од носот е губење крв од ткивата што ја обложуваат внатрешноста на носот. Во носот се наоѓаат многу крвни близу површината, во слузницата на носот, што го олеснува крвавењето. Крвавењето од носот не е ништо невообичаено бидејќи бројките покажуваат дека до 60 отсто од луѓето имаат барем едно крвавење од носот во текот на животот, покажуваат податоците од клиниката во Кливленд.

А, причините за тоа се многубројни. Тука спаѓаат допирањето на носот со ноктите, инфекција на горните дишни патишта и синуситис, силно дување на носот, ставање туѓ предмет во носот, повреда на носот или лицето, алергии, лекови за разредување на крвта, прекумерна употреба на спреј за нос или злоупотреба на дрога.

Дали крвавењето од носот е знак за ковид-19?

– Не сум видел дека крвавењето од носот е дел од симптомите што се јавуваат кај ковид – изјавил за порталот „Хелт“ експертот за заразни болести Амеш А. Адаља, висок научник во Центарот за здравствена безбедност во Џонс Хопкинс.

Доктор Ричард Воткинс, доктор за заразни болести и професор по интерна медицина на Медицинскиот универзитет во Охајо, се согласува со тоа. Тој за „Хелт“ рекол дека никогаш не видел дека ова им се случува на пациентите со ковид.

Џон Селик, доктор по заразни болести и професор по медицина на Универзитетот во Бафало, истакнува дека крвавењето од носот дефинитивно не е главниот симптом на ковид-19. Тој потсетува и дека сме во период од годината кога на луѓето им крвави носот поради алергии и престој во климатизирани простории.

Може да биде нуспојава на другите симптоми на ковид-19

Меѓутоа, крвавењето од носот може да биде нуспојава на некои симптоми на коронавирусот.

– Очигледно, ако некој има назални симптоми и силно го дува носот, може да дојде до крвавење, вели д -р Адаља.

– Гледаме луѓе со крвавење од носот со другите респираторни вирусни инфекции, така што тоа не би ме изненадило. Не можам да кажам дека повеќето пациенти со ковид што ги видовме во болница крвавеа од носот, вели д -р Селик.

На крајот, може да се заклучи дека ако носот почне да ви крвави, а немате други симптоми, најверојатно немате ковид -19. Но, ако крвавењето од носот доаѓа заедно со другите знаци на вирусот, како што се треска и кашлица, дистанцирајте се сами од другите и обратете се кај лекар.