Пристигна пролетта, а со неа и познатите непријатели на кучињата, малите, но упорни и често опасни паразити наречени крлежи. Пронаоѓањето крлеж на вашето куче секогаш е причина за загриженост, а неговото отстранување понекогаш не е пријатно искуство.

Познато е дека крлежите пренесуваат голем број сериозни болести, вклучувајќи ја и Лајмската болест, која може да ги им наштети и на луѓето. Сепак, постојат неколку начини како да се спречи појавата на крлежи кај кучињата или, доколку навистина се „закачат“, да се отстранат релативно лесно и безбедно, пишува „Догкетпетс“.

Животен циклус и хранење на крлежите

Крлежите се паразити кои можат да се најдат насекаде на отворено, но најчесто живеат на тревни површини. Високата трева и лисјата се совршени скривалишта за крлежите, каде што лесно можат да се закачат за „жртвата“ што поминува покрај нивното живеалиште. Повеќето крлежи избираат специфичен домаќин, како човек или куче, но и кое било друго суштество. Животниот циклус на крлежот може да трае три до четири години.

По оброкот со крв, женката крлеж снесува јајца во близина на домаќинот. По неколку недели до неколку месеци, ларвите излегуваат од јајцата, најчесто во лето, а потоа го бараат својот прв крвен оброк, обично од малите цицачи кои се наоѓаат во близина.

По хранењето, крлежите преминуваат во стадиум на кукла, продолжувајќи да бараат оброци со крв од домаќинот на кој постојано се прикачуваат и може да бидат носител на многу болести. По оваа фаза, крлежите преминуваат во фаза на возрасни еиднки и ќе се обидат повторно да се хранат на есен, или пак ќе хибернираат и повторно ќе се хранат на пролет. Помеѓу оброците, крлежите ќе се репродуцираат и ќе го започнат својот животен циклус одново.

Како изгледа крлежот на куче?

Понекогаш е тешко да се забележат крлежи на куче, особено ако се мали и не почнале да се хранат. Често гледаме крлеж, но мислиме дека тоа е бенка или брадавица на телото на кучето. Крлежите ги закопуваат главите под кожата додека се хранат, оставајќи го задниот крај на нивните тела испакнати. Ова изгледа како тврда, тркалезна, црна или кафена дамка. Како што се храни крлежот, тој почнува да се полни со крв и да се зголемува. Кога крлежот ќе заврши со хранење, се одвојува од телото на домаќинот, оставајќи зад себе мала рана на местото на хранење.

Симптоми на каснување од инфициран крлеж

Вашето куче може да се обиде да го отстрани или касне крлежот за хранење бидејќи местото го чеша или иритира. Откако ќе се откачи крлежот, може да забележите и мала црвена рана околу местото на каснување. Болестите што се пренесуваат преку крлежи може да се манифестираат и со неколку слични симптоми, вклучувајќи треска, летаргија, губење на апетит, болка или парализа, додека некои болести кои се пренесуваат преку крлежи може да предизвикаат оштетување на внатрешните органи, како што е бубрежно заболување. Овие проблеми се манифестираат како промени во жедта, мокрењето, дебелото црево или навиките за јадење.

Третман и превенција на крлежи кај кучињата

Постојат многу превентивни производи кои го намалуваат или спречуваат закачувањето на крлежите на вашето куче. Покрај оралните лекови, најчесто користени се околувратници или ампули кои ги одбиваат крлежите да се закачат за телото на миленикот и се особено добри за кучињата кои поголемиот дел од времето го поминуваат на отворено. Спрејовите за крлежи се исто така корисни: тие убиваат и одбиваат крлежи. Ако живеете во куќа и имате двор, одржувањето, косењето трева, вадењето лисја… природно може да ја намали популацијата на крлежите на овие места каде што најмногу се собираат.

Рачно отстранување на крлежот

Ако забележите крлеж на телото на вашето куче, не паничете. Ако користите пинцета, не стискајте, бидејќи тоа може да ослободи крв (и патогени од крлежот) во телото на вашето куче. Пинцетата може случајно да ја оттргне главата на крлежот подалеку од телото, која ќе остане вметната во кожата на кучето и ќе предизвика инфекција. Потрудете се пинцетата да ја приближите што е можно поблиску до кожата на кучето за да го отстраните крлежот, а доколку сте вешти, можете да користите и специјални куки за отстранување на овие паразити.