Надворешната канцеларија за криминалистички работи во Делчево поднесе кривична пријава до Основното јавно обвинителство против градоначалникот на општина Делчево, Горан Трајковски, поради сомнение за злоупотреба на службената положба и овластување.

Според пријавата, на 1 август 2018 година, по јавен оглас за вработување административен службеник, пријавениот како овластено службено лице донел незаконска одлука за избор на кандидат кој во моментот ги исполнувал условите за пензионирање и не можел да биде вработен согласно Законот за административни службеници.

– Пријавениот Г.Т. како овластено службено лице градоначалник на Општина Делчево на 01.08.2018 по јавен оглас од 25.06.2018 за вработување на административен службеник, злоупотребувајќи ја својата службена положба и овластување со пречекорување на границите на службената должност донел незаконска одлука за избор на кандидатот В.М. од Делчево, кој уште во првата фаза од постапката за вработување, како и во моментот на донесување на решението за стекнување на статус на административен службеник ги исполнувал законските услови да се стекне со право на пензиско и инвалидско осигурување со навршени 64 години старост, што претставува основа за престанок на работен однос на административен службеник, а не основа за вработување согласно член 98 став 1 алинеа 3, а во врска со член 98 став 5 алинеја 9 и 10 од Законот за административни службеници – соопштија од МВР.

Со ова, на кандидатот В.М. од Делчево му било овозможено да се стекне со противправна имотна корист од 505.561 денари на име плата, додека на Општина Делчево ѝ била нанесена штета во износ од 762.318 денари по основ на исплатени плати и придонеси.