Барби и Кен најверојатно ќе ја красат сцената на „Златните глобуси“ следниот месец, но на организаторите на шоуто им е тешко да најдат некој, кој ќе сака да биде домаќин на настанот.

Со објавувањето на номинациите во понеделникот наутро, потрагата по водител на шоуто сѐ уште е во тек, дознава „Си-ен-ен“.

Двократниот водител на Оскарите, Крис Рок, е меѓу оние кои ги одбиле понудите за домаќин на церемонијата на 7 јануари, дознава „Си-ен-ен“. Покрај Крис, уште најмалку четворица други комичари, актери од А-листата на Холивуд ја одбиле понудата од организаторите.

Друга, потенцијална номинирана за нејзината изведба во серијата „Beef“ на Нетфликс, Али Вонг, исто така добила понуда да биде водителка на церемонијата, но Вонг ја одбила понудата.

И Вил Арнет, Шон Хејс и Џејсон Бејтман, кои беа ко-домаќини на поткастот „SmartLess“, ја одбиле заедничката понуда да бидат трио водители.

Има малку надеж дека ќе се вратат Ејми Полер и Тина Феј, кои ги водеа „Глобусите“ четири пати до сега, иако двете актерки претходно ветија дека завршиле со овој ангажман.