Американскиот пејач Крис Браун (35) и компанијата „Лајв нејшн“ се обвинети за насилство од четворица посетители на концерт на ар-ен-би ѕвездата. Тие тврдат дека Браун „брутално и жестоко ги претепал“ по неговиот настап во Форт Ворт и бараат отштета од 50 милиони долари, објави „Ти-ем-зи“.

Според тужбата поднесена од Лери Паркер, Џозеф Луис, Чарлс Буш и Да Маркус Пауел, пејачот и неговите соработници фрлале со столови по нив, а потоа ги удирале и газеле. Тие тврдат дека биле поканети зад сцената за време на шоуто во Дикис Арена, каде Браун настапувал како дел од турнејата „11:11“.

Во тужбата тие истакнаа дека Браун учествувал во насилството. Покрај него и „Лајв нејшн“, тие ги обвинија и соработниците на пејачот – Синко Сиџ, Худ Бос и Јел Бизи.

Како што опишале, пред да заминат од зад сцената, еден од соработниците на Браун му рекол на пејачот дека тој и Чарлс Буш биле скарани. „О, да, бевме. Не заборавам“, наводно му рекол Браун, а потоа го нападнал. Во тужбата тие навеле дека го удриле Лари Паркер и го тепале 10 минути. „Сите тужители се на третман и ќе бараат дополнително лекување во иднина“, се наведува во тужбата.

Што се однесува до „Лајв нејшн“, тие ја тужат компанијата затоа што не ја обезбедила безбедноста на посетителите на концертот.

Освен обештетување, бараат и привремена забрана за приближување.