Чашата за пиво на научникот Исак Њутн ќе биде јавно изложена за прв пат по 160 години, во Кралското друштво во Лондон. Дрвената чаша ќе биде дел од изложбата што ќе се отвори на 4 март, а ќе има изложено и други предмети од Њутн, вклучувајќи го и неговото најпознато дело „Математички принципи на природната филозофија“ и маската што ја носел по неговата смрт, подготвена да се користи како модел за правење статуи, пишува „Гардијан“.

Изложбата е резултат на 20-годишно истражување на научникот Кармил Валас и историчарот Стивен Снобелен, кои ја реконструирале историјата на чашата за пиво користејќи писма, генеалошки записи, семејни тестаменти, списанија, весници и песни.

Њутн му ја дал чапата на својот цимер и повремен лабораториски асистент Џон Викинс, кој живеел со него 20 години. Таа била пронајдена меѓу другите работи на Њутн во неговиот дом на колеџот Тринити, Кембриџ.

Нивното истражување исто така ги истакнува експериментите на Њутн со пивото, вклучително и проучувањето на ферментацијата.

Малку е познато колку пиво пиел Њутн, наводно, тој пиел умерено и секогаш со оброк.