Портпаролот на Кремљ, Дмитриј Песков ги негираше тврдењата на италијанскиот премиер Џузепе Конте дека рускиот претседател Владимир Путин му ветил оти ќе формира комисија за истражување на случајот со рускиот опозициски политичар, Алексеј Навални.

Песков истакна дека двајцата лидери ја допреле приказната за инцидентот со Навални за време на разговорите и дека Путин рекол дека Русија е решена да открие што се случило. Тој додаде дека не исклучува можност да има недоразбирање, пренесува Тасс.

– Тие навистина ја допреа темата во врска со берлинскиот пациент, рече Песков и додаде дека Путин го известил италијанскиот премиер дека предистражните активности траат веќе некое време.

Конте претходно изјави дека Путин му кажал дека ќе формира комитет за испитување на наводното труење на Навални.

– Претседателот Путин ме увери (во неодамнешниот разговор) дека Русија има намера да разјасни што се случило и ми рече дека ќе формира истражна комисија и дека е подготвен да соработува со германските власти, изјави Конте за „Ил фолио”.

Германија тврди дека Навални бил отруен од нервниот агенс Новичок и дека целта била негово убиство, додека Русија наведува дека нема докази дека Навални бил отруен.