Кралот Чарлс Трети објави оглас за вработување управител со градините во Бакингемската палата, кој ќе има плата од 40.000 фунти годишно. Имајќи го предвид обемот на работа, потребното знаење и огромната одговорност, платата не е висока, но ќе му донесе голем престиж на вработениот.

Новиот британски крал е страстен љубител на природата, екологијата, селскиот живот и градинарството. Иако многумина сметаа дека тоа што Чарлс разговара со своите растенија е само озборување, тој навистина го прави тоа. Додека сè уште беше принц, тој зборуваше за оваа невообичаена активност во медиумите – првиот пат во 1986 година и вториот пат во 2012 година.

„Застанувам и разговарам со нив, навистина. Многу е важно да се разговара со растенијата и тие реагираат“, раскажа своевремено британскиот крал.

Затоа во огласот се бара градинар кој „страсно сака растенија“ и кој ќе работи 39 часа неделно во кралските градини.

Во огласот, објавен на кралската веб-страница, пишува: „Како управител со градините во Бакингемската палата, вие ќе бидете одговорни за нивното одржување според исклучителни стандарди. Ќе бидете горди, гледајќи илјадници луѓе кои уживаат во нив за време на забавите во градините.“

Работниот распоред на градинарот ќе вклучува одржување на тревникот, но и грижа за живата ограда и цвеќињата, особено за розите.

„Со посветеност на хортикултурата, вие ќе бидете фокусирани на имплементација на нашите проекти за зачувување и подобрување на богатиот биодиверзитет на нашите градини. Ако сте страсни за растенијата, како и за луѓето, оваа улога ќе ве инспирира да постигнете успех“, стои во огласот.

Исто така, кралското семејство бара и управител со градините во замокот Виндзор. Овој градинар ќе заработува нешто помалку од неговиот колега во Бакингемската палата, односно 38.000 фунти годишно.

Конкурсот за двете позиции завршува на 3 ноември.