Пријателството меѓу британскиот монарх, кралот Чарлс Трети, и фудбалската легенда Дејвид Бекам доби нов поттик откако беше откриено дека кралската двојка испратила посебен подарок по повод 50-тиот роденден на Бекам.

Имено, за време на нивната средба на престижниот саем за цвеќиња во Лондон, кралот Чарлс и кралицата Камила топло го поздравија поранешниот англиски репрезентативец, кој неодамна го прослави својот јубилеј.

Бекам, кој неодамна стана амбасадор на Фондацијата на кралот, изрази искрена благодарност за подарокот што кралот и кралицата му го испратиле за неговиот 50-ти роденден.

„Ги добивте, нели?“ прашал кралот за подарокот за роденденот што го испратил.

„Беше неверојатно. Ви благодарам! Многу љубезно од ваша страна“, рекол видливо трогнатиот Бекам, на што кралицата Камила додала: „Мило ми е што ги добивте розите.“

Иако доаѓаат од сосема различни светови, кралот и поранешниот фудбалер се поврзани со заедничка страст за градинарство, а ова не е првпат Бекам да добие покана за дружење со кралското семејство. Всушност, тој и Викторија беа меѓу гостите на свадбата на принцот Хари и Меган Маркл.

Посебно внимание на кралскиот пар привлече градината за кучиња, дизајнирана од познатиот градинар Монти Дон. Оваа уникатна градина, која ја одразува британската љубов кон кучињата, има патеки врежани со имињата на кралските миленици, вклучувајќи го кучето на Камила, Блубел, и новото кученце Моли, како и кучето на Чарлс, Снуф.

Други значајни посетители беа Џејмс Мидлтон, братот на принцезата од Велс, кој дојде со својата сопруга и нивните две миленици.