Амазон МГМ ја презема креативната контрола врз култната филмска франшиза, а претходните продуценти Барбара Броколи и Мајкл Г. Вилсон се повлекуваат. Филмовите за Бонд беа лансирани од Алберт Броколи во 1962 година, пред неговата ќерка и посинок да ја преземат функцијата.

Според Си-ен-ен, Мајкл Г. Вилсон и Барбара Броколи, дуото што ги донесуваше филмовите за агентот 007 во кината повеќе од 60 години, ќе останат косопственици на франшизата, а започнаа и нов заеднички проект со Амазон МГМ, предавајќи ги креативните узди и контролата над целата идна продукција на компанијата основана од Џеф Безос.

Амазон го купи МГМ во 2022 година за 8,25 милијарди долари, преземајќи го каталогот на холивудското студио со 4.000 филмови и повеќе од 17.000 телевизиски емисии. Како дел од договорот, Амазон ги доби правата за дистрибуција на сите 27 филмови базирани на книгите на Иан Флеминг. Филмовите за Бонд на МГМ се најпрофитабилната интелектуална сопственост на студиото, што им донело милијарди од првото објавување на „Доктор Но“ во 1962 година. Последниот филм за Џејмс Бонд, „Нема време за умирање“, беше 25-тиот филм за познатиот 007, а беше објавен во 2021 година и заработи 775 милиони долари.

По објавата во четвртокот, Џеф Безос ги праша фановите на Твитер: „Кој е вашиот избор за следниот Бонд?

Формирањето на заедничкиот проект може да навести дека студиото Амазон МГМ се подготвува да објави нов филм за Бонд и нов актер во насловната улога. Како можни имиња за улогата на тајниот агент се споменуваат Џејмс Нортон, Арон Тејлор-Џонсон и Тео Џејмс.