Две наставнички и 15 деца од училиште во кавадаречко се ставени во изолација, откако седумгодишен ученик добил позитивен резултат на ковид-19 тест, потврди доктор Ристе Јовановски, специјалист епидемиолог при кавадаречкиот Центар за јавно здравје.

Тој додаде дека изминатото деноноќие се регистрирани рекордни 54 случаи позитивни на коронавирус во Тиквешко.

– Од новозаболените лица, 40 се од Кавадарци, 13 од Неготино и едно од Демир Капија. Второодделенец е меѓу новите случаи, со себе во изолација стави и две наставнички, како и 15 деца. Извршена е дезинфекција во кавадаречкото училиште, нагласи Јовановски.

Додаде дека се работи на утврдување на нивните контакти, со цел да се изолираат.