Градоначалникот на Општина Бутел, Дарко Костовски ги отфрла обвинувањата на градоначалничката на Град Скопје, Данела Арсовска во врска со проектот за изградба на булеварот „Боца Иванова“ и обвинува дека таа, а не тој, прави политиканство.

„За помалку од две години, Арсовска се скара со ВМРО-ДПМНЕ, со синдикатот во Водовод, со синдикатот на ЈСП, со директорите на сите претпријатија за кои велеше дека се најдобри за модерно Скопје. Се скара и со МКЦ и вработените, со приватните превозници, со градоначалниците од ЗЕЛС, а деновиве започна да се кара и со народот од општина Бутел“, пишува Костовски во објава на Фејсбук.

Тој вели дека на Арсовска, ниту еднаш не и посочил дека најголем проблем во неговата општина е таа улица која за неа е приоритет, поради, како што вели, лични причини.

„Многу симтоматично зошто Арсовска инсистира да не ја промени трасата, а приватната фирма да ја изгради трасата која вети дека ќе ја ревидира пред изборите“, пишува Костовски и најавува дека повеќе детали ќе изнесе на прес – конференција во понеделник.

Арсовска претходно посочи дека Градот Скопје нема намера да врши кривичен прогон на граѓани, но сакала да апелира до граѓаните на Бутел да не потпаѓаат под политичките игри и манипулации на политиканти кои се обидуваат да ги инструментализираат во својата нечесна политика.

Арсовска: Булеварот Боца Иванова во Бутел ќе се гради, Костовски да не манипулира