Алехандро Домингез, претседателот на владејачкото тело на јужноамериканскиот фудбал КОНМЕБОЛ, во четврток даде официјален предлог за проширување на Светското првенство во машка конкуренција во 2030 година од 32 на 64 репрезентации.

Светската фудбалска куќа (ФИФА) е запознаена со предлогот што првпат беше претставен во март од делегат од Уругвај за време на онлајн состанок на владејачкиот совет на управното тело на светскиот фудбал, пренесува „ЕСПН“.

– Убедени сме дека прославата на 100-годишнината ќе биде единствена бидејќи 100 години се слават само еднаш – рече Домингез за време на неговиот говор на отворањето на 80 редовен конгрес на КОНМЕБОЛ.

Светското првенство во 2030 година веќе е предвидено да биде најширокото издание со шест земји домаќини распоредени на три континенти.

Уругвај беше домаќин на првото Светско првенство во 1930 година и е предвидено да организира еден натпревар. Парагвај, Аргентина, Шпанија, Португалија и Мароко се исто така ко-домаќини.