Денеска, Архитектонскиот факултет ја одржа втората работилница за потребите за изготвување на студиите. На работилницата покрај експертските тимови, учествуваа засегнатите страни, чинителите и одлучувачите од локалната самоуправа.

Битолскиот градоначалник Тони Коњановски нагласи дека очекува активна вклученост на сите релевантни фактори, во овој процес, кој ќе резултира со донесување на многу значаен и неопходен документ за Битола.

„Денес, како резултат на соработката со Архитектонскиот факултет, се одржа втората работилница на која беше презентиран процесот на изработка на студиите и стратегијата за Општина Битола, анализата на постоечката состојба и согледувањата за проблемите и можностите, за што секако од особена важност е и критичката анализа со цел подобрување на согледувањата и заклучоците од експертските тимови. Денес го дефинираме правецот на стратешкото делување во однос на предизвиците и можностите, како важни сегменти на живеењето во градот, градските функции, развојот на стопанството, индустријата и воопшто економскиот напредок. Органограмот на соработка во оваа фаза ги вклучува сите институции, јавни претпријатија, општинската администрација и секако битолските советници како претставници на граѓаните-рече на денешната работилница, градоначалникот на Битола Тони Коњановски.

Тој очекува активна соработка и вклученост од сите со цел успешно завршување на отпочнатиот процес до донесување на новиот генерален урбанистички план, кој ќе го замени постоечкиот од 1999 година и ќе одговара на современите потреби на Битола.

На денешната работилница, беа претставени седум влезни студии, кои влегуваат во изработката на Генералниот урбанистички план за Општина Битола, изработени од Архитектонски Факултет-Скопје, преку проектот БАИР-„Здружена акција на Битола за вклучување на Роми”.

Ова е еден од чекорите кон креирање на нов Генерален урбанистички план за Општина Битола, како клучен документ за одржлив развој на градот, паметно домување и подобрување на квалитетот на живот.